ދިވެހި ރެޑް ކްރެސެންޓްގެ ބިލާއި، އާއިލާއާއިބެހޭ ޤާނޫނަށް އިސްލާހުގެނައުމުގެ ބިލް މަޖިލީހުން ބަލައިގަނެ އިޖްތިމާއީ ކަންކަމާއިބެހޭ ކޮމިޓީއަށް މިއަދު ފޮނުއްވައިފިއެވެ.  

މިއަދުގެ ޖަލްސާގައި ރެޑް ކްރެސެންޓްގެ ބިލާބެހޭގޮތުން ވާހަކަފުޅުދައްކަވަމުން ގިނަ މެންބަރުންވަނީ، މިޖަމާއަތުގެ ތެރެއިން ލާފައި ލާދީނީ ނުފޫޒެއް ފޯރަފާނެކަމުގެ ބިރު ފާޅުކުރައްވާފައެވެ.

މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބުދެއްވަމުން، ދައުލަތުގެ ބަނޑާރަ ނައިބް އަލްއުސްތާޛާ ފާތުމަތު ދިޔާނާ ސައީދު ވިދާޅުވީ، ދިވެހިރާއްޖޭގެ ޤާނޫނުއަސާސީއާއި، ޤާނޫނާއި ގަވާއިދުގެތެރޭގައި ލާދީނީ ކަންކަމަށް އެއްވެސް ޖާގައެއް ނެތްކަމަށާއި، އަދި ޖާގައެއް ނުވެސް އޮންނާނެކަމަށެވެ.

މިއަދުގެ ޖަލްސާގައި މިލަދުންމަޑުލު ދެކުނު ބުރީގެ މެންބަރު އަލީ މުހައްމަދު ހުށަހެޅި ނޫނު ހޮޅުދޫގެ އުތުރު ފަރާތް އާދަޔާ ޚިލާފަށް ގިރައި، އެހިސާބުގެ ގެތަކަށް ރާޅުއަރަމުންދާތީ، އެރަށުގެ ހަތްދިހަ އަށްފަރާތުގެ އެދުމުގެމަތިން ނ.ހޮޅުދޫ އިރަމާގޭ މުހައްމަދު ޒުހުރީ ހުށަހަޅާ ޕެޓިޝަނެއް ހުށަހަޅައި، އެޕެޓިޝަންވަނީ ޕެޓިޝަން ކޮމިޓީއަށް ފޮނުއްވާފައެވެ.