ދިވެހިރައްޔިތުންނަށް މިވެރިކަން ބަދަލުކުރެވިދާނެކަމުގެ ފުރިހަމަ ޔަގީންކަން ލިބުނު ދުވަހަކީ 8 އޮކްޓޯބަރުވީ ބުދަދުވަސްކަމުގައި ވަޠަން އެދޭ ގުޅުމުގެ ކެންޑިޑޭޓް މުހައްމަދު ނަޝީދު އަންނި ވިދާޅުވެއްޖެއެވެ. އަންނި މިހެން ވިދާޅުވީ އެގުޅުމުގެ ފަރާތުން ރޭ ކެމްޕެއިންގެ ދެވަނަ ބުރު އިފްތިތާހްކުރުމަށް ދަރުބާރުގޭގައި ބޭއްވި ބައްދަލުވުމުގައި ވާހަކަފުޅު ދައްކަވަމުންނެވެ. 

ދިވެހިރައްޔިތުން މިއުއްމީދުކުރާ އަނެއް ގޮތް، ވަތަން އެދޭގޮތަށް ދިޔައިމާ ލިބޭނެކަން ރައްޔިތުން ވަރަށް ސާފު ސަރީހަ އިބާރާތުން އިންތިޚާބުން ކިޔައިދީފިކަމަށްވެސް މުޙަންމަދު ނަޝީދު އަންނި ވިދާޅުވިއެވެ. "ހެޔޮ ވެރިކަން ކުރުމަށްޓަކައި ޑިމޮކްރަސީގެ ރީތި އުސޫލުތައް އަށަގެންނެވުމަކީ ކޮންމެހެން ބޭނުންތެރިކަމެއް. އަޅުގަނޑު ދަންނަވާނީ 1950ގެ އަހަރުތަކުގައި ގާހިރާގެ ހިރަފުހުގައި އުޅުއްވާފައި އަދި ވަޑައިގެންނެވިއެއްކަމަކު ތިމަންނާއަށް ޑިމޮކްރަސީ އެނގިވަޑައިގަންނަވާކަމަށް ވިދާޅުވެ އޭގެ ފިލާވަޅު އަޅުގަނޑުމެންނަށް ދޭން ނުހައްދަވާށޭ. އަޅުގަނޑުމެންނަށް އެނގިއްޖެއޭ ތިވިދާޅުވާ ޑިމޮކްރަސީ ހުރިގޮތް. އަދަގޮނޑިއާއި ޗޭނާއި އޭންގަލް ދަގަނޑާއި އަޅުގަނޑުމެން ދަންނަމޭ ފެން ގޮޅިވެސް. ޓިނު ގޮޅިވެސް. އަޅުގަނޑުމެންނަށް ތިގަދަ ފަސްއަހަރު ދައްކަވަން ދެން ނޫޅުއްވާށޭ. ފިސާރި ގަދަފަދައޭ، ފިސާރި ގަދަކޮނޭ މިދިޔަ 30 އަހަރުވެސް އަޅުގަނޑުމެންނަށް ފެނިފަ މިއޮތީ. ބައްޔެއް ނޫނޭ. ހަމަގައިމުވެސް އަޅުގަނޑަށް ދިމާވި 20 ވަރަކަށް އަހަރު ދިމާވީ ގަދަކޮށް. އެހެންވީމާ، މާތް ކަލާކޯއޭ އަޅުގަނޑު ދަންނަވާނީ މަނިކްފާނުއޭ ދެން ތިގަދަކަން ނުދައްކާށޭ. އަދިހަމަ އަބަދުވެސް ހިތަށްއަރާ ވާހަކައެއް އިނގޭތޯ އުމުރުން 80 އަށް އަޅާލީމާ ގަދަވާހަކަ ދެއްކީމާ އެދެއްކެނީ ރަކިސް ބޮނޑެއްގެ ވާހަކައޭ" ރޭގެ ޖަލްސާގައި ވަރަށް ޖޯށާއި ފޯރީގައި ވާހަކަފުޅުދައްކަވަމުން ކެންޑިޑޭޓް މުހައްމަދު ނަޝީދު ވިދާޅުވިއެވެ.  

އަޅުގަނޑުމެން މިއުއްމީދުކުރާ ސަލާމަތުގެ އައްސޭރިއަށް މިދިވެހިރާއްޖެ ގެންދިޔުން އެއީ އަޅުގަނޑުމެންގެ ވާޖިބެއްކަމަށާއި، ޖީލެއްގެގޮތުގައި ކުރާން ޖެހިފައި އޮތްކަމެއްކަމަށް ނަޝީދު ވިދާޅުވިއެވެ. އަޅުގަނޑުމެންގެ ދަރީން އަދި އަޅުގަނޑުމެންގެ ދަރީންގެ ދަރީން، އަޅުގަނޑުމެން މިއުޅުނު ހާލުގައި އުޅޭކަށް ބޭނުންނުވާކަމަށާއި، މިރާއްޖެ އެހެންގޮތަކަށް ބަދަލުކުރެވެން އެބައޮތްކަމަށް އަންނި ވިދާޅުވިއެވެ. 

މިއިންތިހާބުގެ ފުރަތަމަބުރުގެ ތެރެއިން ދިވެހިރާއްޖޭގައި ސިޔާސީ ޝަޚްސިއްޔަތުތަކެއް ހުރިކަން އަޅުގަނޑުމެންނަށް އެނގިގެންދިޔަކަމަށްވެސް ނަޝީދު ވިދާޅުވިއެވެ. ސަރުކާރުގެ މަޤާމު ކިތަންމެ ވަރަކަށް ފުރުއްވިނަމަވެސް އަދި އެހެންވެސް މަތިވެރި މަޤާމެއް ފުރުއްވިކަމުގައިވިޔަސް ސިޔާސީ ލީޑަރަކަށް ވާނީ ރައްޔިތުންގެ ކުރިމައްޗަށް ނުކުމެ ވޯޓަކާއި ކުރިމަތިލީމައިކަމަށްވެސް ވިދާޅުވިއެވެ. "އަޅުގަނޑުމެންނަށް އެނގިއްޖެ މުސްތަގްބަލްގެ ސަރުކާރެއް އޮންނާން ވީގޮތް. އެއީކީ އަޅުގަނޑުގެ ޅިޔަނުންނާއި އަޅުގަނޑުގެ ދެބެންގެ ދެދަރި މީހުންނާއި އަޅުގަނޑުގެ އެއްބަފާމީހުން ލައިގެން ކުރާކަމެއް ނޫންކަން، މިއީ ރައްޔިތުން އެދޭމީހުން ލައިގެން ކުރާ ކަމެއްކަން. އަޅުގަނޑުމެންނަށް ގުޅިފައިއޮތް ސަރުކާރެއް ހެދުމަށް ނޫންގޮތެއް ރައްޔިތުންނެއް ލަފައެއް ނާރުވާ. އިންތިޚާބުގެ ނަތީޖާ ވަރަށްސާފު. ކަލޭ އެކަނި ތިކަން ކުރާން ނޫޅެއްޗޭ. އަޅުގަނޑަކު ނޫޅެން. އަޅުގަނޑުމެން ބޭނުމީ އަޅުގަނޑުމެން އެންމެން އެކީގައި މިކަން ކުރެވޭނެ ގޮތެއް، އިންތިޒާމެއް ގާއިމްކުރުން. އަޅުގަނޑުމެން އުފައްދާ ސަރުކާރެއްގައި އަޅުގަނޑުމެންގެ އެކަނި ސަރުކާރަކަށް، ވަކި ޕާޓީއެއްގެ ވަކި ބައެއްގެ ވަކި މީހެއްގެ ވަކި އާއިލާއެއްގެ ވަރި ރަށެއްގެ ސަރުކާރަކަށް ވެގެން ނުދާނެ. އެއީ ދިވެހިންގެ ސަރުކާރެއް. ދިވެހި ރައްޔިތުންގެ ސަރުކާރެއް" މިޖަލްސާ އަޑުއަހަންތިބި އެތައް ހާސް ބަޔަކާއި މުޚާތަބްކޮށް އަންނި ވިދާޅުވިއެވެ.  

އެކިފަރާތްތަކުން މައުމޫން ވެރިކަމުގައި ނުބަހައްޓަންވީ ސަބަބުތައް ހާމަކުރެއްވިއިރު އަންނި ވިދާޅުވީ މައުމޫނަށް ދެން ފުރުސަތު ނުދޭންވީ އެންމެބޮޑު ސަބަބުކަމަށް އެމަނިކުފާނަށް ފެނިލައްވަނީ މިހާ ގިނަދުވަހު ވެރިކަމުގައި ހުންނެވީތީކަމަށެވެ. "ހަމަ އެސަބަބަށްޓަކައި، އިތުރު ސަބަބުތަކަށްޓަކައެއް ނޫން. އަޅުގަނޑުމެން ސިއްހަތު، މަދަރުސާ، މީގެން އެއްވެސް ވާހަކައެއް ދައްކާކަށް އަޅުގަނޑެއް ނެތިން. 30 އަހަރު މަނިކްފާނު ހުންނަވައިފީމެއް ނޫންހޭ، ދެން މާތް ކަލާކޯއަށްޓަކައި ފައިބާވަޑައިގަންނަވާށޭ" އަންނި ވިދާޅުވިއެވެ.