ޑީއާރްޕީގެ ލީޑަރު އަދި ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު އަހުމަދު ތަސްމީނު އަލީގެ އަތުން ހަތަރު ލައްކައަށްވުރެ ގިނަ ޑޮލަރު ހޯދުމަށް ތިން އަންހެނަކު މަދަނީ ކޯޓުގައި ދައުވާކޮށްފިއެވެ.

މިތިން އަންހެނުން ދައުވާކޮށްފައިވަނީ، އެއިން ކޮންމެމީހަކު 25 ޕަސެންޓް ހިއްސާވާ ވިކްޓޯރިޔަސް ޓްރެވެލް އެންޑް ޓްއާސްގެ ށ.ކަނބާލިފަރު ރިސޯޓު ތަސްމީނަށް ވިއްކާލުމުން ކުންފުނީގެ ކޮންމެ ޑައިރެކްޓަރަކަށް ވަކިވަކިން ތަސްމީނު ދެއްވަންޖެހޭ ފައިސާގެތެރެއިން ، އެތިން އަންހެނުންނަށް ދޭންޖެހޭ ފައިސާގެ ބޮޑުބައެއް ތަސްމީނު ދެއްވާފައި ނުވާކަމަށްބުނެ، އެފައިސާ އެކީ އެއްފަހަރާ ޝަރީއަތް މެދުވެރިކޮށް ހޯދުމަށެވެ.

ތަސްމީންގެ މައްޗަށް ދައުވާކުރީ މއ. ބިންމަތީގޭ އައިޝަތު އާލިމާ އަލީއާއި، ދ. ކުޑަހުވަދޫ ފަޅޯގަސްދޮށުގޭ ޠާހިރާ ހުސައިންއާއި، ބ.އޭދަފުށީ އަލިވާގޭ ޝަހީދާ ޒަކަރިއްޔާއެވެ. މީގެތެރެއިން ޠާހިރާއި ޝަހީދާ ދައުވާކޮށްފައިވަނީ 150000 އެމެރިކާ ޑޮލަރު  ނަގައިދިނުމަށެވެ. އަދި އާލިމާ  ދައުވާ ކޮށްފައިވަނީ 126،653 ޑޮލަރު އެއްފަހަރާ ނަގައިދިނުމަށެވެ. މިތިންމީހުންގެ އިތުރުން، އެކުންފުނީގެ އަނެއް ހިއްސާދާރަކީ އަލީފާ އަހުމަދެވެ. އޭނާ ތަސްމީންގެ މައްޗަށް ދައުވާއެއް ނުކުރެއެވެ.

ދައުވާކުރި ތިން އަންހެނުން ބުނީ،  އެރަށް ވިއްކާލުމުން ކުންފުނީގެ ހަތަރު ޑިރެކްޓަރުނަށް ތަސްމީނު ދެއްވަންޖެހޭ ފައިސާގެތެރެއިން  މިދިޔައަހަރުގެ ސެޕްޓެމްބަރުމަހާ ހަމައަށް ފައިސާ ދެއްކެވިކަމަށެވެ. ނަމަވެސް އޭގެފަހުން މިހާތަނަށް ފައިސާ ނުދައްކަވާކަމަށެވެ.

ވިކްޓޯރިޔަސް ޓްރެވެލް އެންޑް ޓްއާސްއިން ށ.ކަނބާލިފަރު ތަސްމީނަށް  ވިއްކާލީ 8.7 ލިއަން ޑޮލަށެވެ. ށ.ކަނބާލިފަރު ރިސޯޓަކީ ވިކްޓޯރިޔަސް ޓްރެވަލްސް އެންޑް ޓްއާސްއިން ޚަރަދުކޮށްގެން މއ.އަނާވިލާ އަލީ ޝަރީފުގެ ނަމުގައި ބިޑްކޮށްގެން އެކުންފުނަޏަށް ލިބުނު ރިޒޯޓެކެވެ.