ސްޓެލްކޯއިން ދެމުން ގެންދާ ކަރަންޓް ހިދުމަތުގެ އަގު ބޮޑުކުރުމަށްފަހު، މުވައްޒަފުންގެ މުސާރަ ބޮޑުކޮށްފިކަމަށް ދެކެވޭ ވާހަކައަކީ ހަގީގަތާއި ޚިލާފު ވާހަކައެއްކަމަށް، މާލެއަށް ކަރަންޓްގެ ޚިދުމަތްދޭ ކުންފުނި، ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ)އިން ބުނެފިއެވެ.

ސްޓެލްކޯއިން މިހެން ބުނެފައިވަނީ ރާއްޖޭގެ އަމިއްލަ ރޭޑިއޯ ސްޓޭޝަނެއްކަމަށްވާ ދިއެފްއެމް "މޯރނިންގް ނިއުސް"ގައި ސްޓެލްކޯ މުވައްޒަފުންގެ މުސާރަ ބޮޑުކޮށްފިކަމަށް ފަތުރާފައިވާ ޚަބަރަކާއިގުޅިގެން އެކަން ދޮގުކޮށް އާއްމުކުރި ނޫސްބަޔާނެއްގައެވެ.

ސްޓެލްކޯގެ ނޫސްބަޔާނުގައިވަނީ، ކަރަންޓްގެ އަގު ބޮޑުކުރުމަށްފަހު މުވައްޒަފުންގެ މުސާރަ ބޮޑުކޮށްފައި ނުވާނެކަމަށާއި އަދި އެޚަބަރު އާއްމުކުރުމުގެކުރިން އެކުންފުނީގެ ބަހެއް ދިއެފްއެމްއިން ހޯދާފައިނުވާކަމަށްވެސް ބުނެފައިވެއެވެ. އެކުންފުންޏާއިމެދު ރައްޔިތުންގެމެދުގައި އިތުބާރާއި ޔަގީންކަން ގެއްލޭފަދަ ގޮތްގޮތަށް ހަގީގަތާއި ހިލާފް ޚަބަރުތައް ނުފެތުރުމަށްވެސް ސްޓެލްކޯއިންވަނީ އިލްތިމާސްކޮށްފައެވެ.