ކާބުލް: އެމެރިކާ ލަދުގަންނަވާލުމަށްޓަކައި އީރާނުގެ ރައީސް މަހްމޫދު އަހްމަދީ ނިޖާދު އަފްޣާނިސްތާނަށް ވަޑައިގެންފިއެވެ. ނިޖާދު ވިދާޅުވީ އަފްޣާނިސްތާނުގައި ބައިނަލްއަޤްވާމީ ބާރުތައްކަމަށް ބުނާ ލަޝްކަރުތަކަށް ޓެރަރިޒަމް ނުހުއްޓުވޭނެ ކަމަށާއި، މިގޮތަށްކުރާ ކަންތައްތަކުން މަގުފަހިވެގެންދާނީ އިތުރު މަދަނީންތަކެއް ކަށްވަޅަށް ފޮނުވުން ކަމުގައެވެ.

ނިޖާދު ވިދާޅުވިގޮތުގައި، އެމެރިކާއިން އަފްޣާނިސްތާނުގައި އެކުޅެނީ ދެސިފަޔަށްއޮތް ގޭމެއް ކަމުގައެވެ. އެއީ އެމެރިކާއިން އެއްދުވަސްވަރެއްގައި އެއްބާރުލުން ދިން ހަނގުރާމަވެރިންނާ ތަޅާފޮޅުން ކަމުގައެވެ.

ނިޖާދުގެ މިވާހަކަފުޅު ބިނާވެގެން މިދިޔައީ، އެމެރިކާގެ ދިފާއީވަޒީރު ރޮބަޓް ގޭޓްސް އަފްޣާނިސްތާނާމެދު އީރާނުން ގެންގުޅޭ ސިފަތަކާއިމެދު ދެއްކެވި ވާހަކަފުޅުގެ ހިޔަންޏެއް ފަދައިންނެވެ. އެއީ އީރާނުން އަފްޣާނިސްތާނުގެ ބާޣީން ނޭޓޯގެ ލަޝްކަރަށް އިހްތިރާމް ނުކުރުމަށް ހިތްވަރުދެމުން އަފްޣާނިސްތާނާ ގުޅުން ރަނގަޅުކުރަން އުޅޭކަމަށް ދެއްކެވި ވާހަކަފުޅާއިގުޅިގެންނެވެ. ގޭޓްސް ވިދާޅުވީ އީރާނަކީ "ދެކޮޅުންކާ ވެނެއް" ކަމުގައެވެ. ނަމަވެސް ތެހެރާން ގޭޓްސްގެ މިވާހަކަފުޅު ދޮގުކުރެއެވެ. ނިޖާދުވަނީ ގޭޓްސްގެ ބަސްފުޅު އޭނާގެ އަނގަފުޅަށް ވައްދަވާ ލައްވާފައެވެ.

އަފްޣާނިސްތާނަށް އެތައްފަހަރަކު ޒިޔާރަތްކުރައްވާފައިވާ ނިޖާދު ވިދާޅުވީ، ޓެރަރިސްޓުން އުފެއްދީ އެމެރިކާއިން ކަމުގައެވެ. އަދި މިހާރު ޓެރަރިސްޓުންނާއި ދެކޮޅަށް ހަނގުރާމަ ކުރަނީކަމަށް އެމީހުން ބުނާކަމުގައެވެ.