ކޮލަމްބޯ: ސްރީލަންކާގެ އެކްސްޕޯޓް ޑިވެލޮޕްމަންޓް އެންޑް އިންޓަރނޭޝަނަލް ޓްރޭޑްގެ ވަޒީރު ޕްރޮފެސަރ ޖީއެލް ޕީރިސް އދ.ގެ ވެރިޔާ ދެކުނުކޮރެޔާގެ ބަންކީ މޫންއަށް ވަރަށްބޮޑަށް ފާޑުވިދާޅުވެއްޖެއެވެ. އޭނާ ވިދާޅުވީ ސްރީލަންކާއާއިމެދު ލަފާހޯއްދެވުމަށް ކޮމިޓީއެއް އެކުލަވާލެއްވުމަށް ބަންކީމޫން ހުށަހެޅުއްވި ހުށަހެޅުއްވުމަކީ އަސާސީ އުސޫލުތަކާއި ޚިލާފަށް ކުރެއްވި ކަމެއް ކަމުގައެވެ.

ކެބިނެޓްގެ ޕްރެސް ބްރީފިންއެއްގައި ގާނޫނީ ދާއިރާގައި ޒަމާންތަކެއް ހޭދަކުރެއްވި މިޕްރޮފެސަރ ވިދާޅުވީ، އދ.ގެ ވެރިޔާގެ މިއަމަލަކީ އދ.ގެ އުސޫލީ ބިންގަލުގެ އިލްމާއި މުޅިން ޚިލާފުކަމެއް ކަމުގައެވެ.

މިވަޒީރު އިތުރަށް ދެއްކެވި ވާހަކަފުޅުގައި ވިދާޅުވީ، އދ.ގެ ވެރިޔާގެ މިފިޔަވަޅަކީ ހުރިހާ ނަޒަރިއްޔާއެއްގެ ބެލުމުންވެސް ނުރަނގަޅު ފިޔަވަޅެއް ކަމުގައެވެ. އަދި ސްރީލަންކާގެ ރައީސް މަހިންދަ ރާޖަޕަކްސަ ކަނޑައެޅިގެން މިކަމާ ދެކޮޅުހައްދަވާފައިވާ ކަމުގައެވެ. އަދިވެސް އިތުރަށް ވިދާޅުވީ، އދ.ގެ އިންސާނީ ހައްގުތަކާއިބެހޭ މަޖިލީހުގައި ވަރަށް ދިގުކޮށް ސްރީލަންކާއިން އިންސާނިއްޔަތާއި ދެކޮޅު އަމަލު ހިންގާފައިވޭތޯ ކުރެވުނު ތުހުމަތާއިމެދު މަޝްވަރާ ކުރެވުނު ކަމަށާއި ބޮޑު އަޣުލަބިއްޔަތަކުން ނެގުނު ވޯޓުގައި އެތުހުމަތުތަކާއި ދެކޮޅު ހަދާފައިވާ ކަމުގައެވެ. އެހެން ކަމާއެކު އޭނާ ވިދާޅުވީ، ކުރުމުއްދަތެއްގެ ސިޔާސީ މަގުސަދެއް ހާސިލްކުރުމަށްޓަކައި ބާރުގަދަ ގައުމުތަކެއްގެ ބޭނުންތަކަކަށް ސްރީލަންކާގެ މައްޗަށް އަމުރުވެރިވުމުގެ ބާރު އެއްވެސްފަރާތަކަށް ލިބިގެންނުވާ ކަމުގައެވެ. ރިޔާސީ އިންތިޚާބުގެ ތެރޭގައިވެސް މިފަދަ ގޮތްތަކަކަށް މަސައްކަތް ކޮށްފައިވާ ކަމަށާއި، ތުހުމަތު ކުރެވިފައިވާގޮތަށް ސަރުކާރު ބަދަލުކުރުމަށްޓަކައި ދާޚިލީ ކަންކަމަށްވެސް ނުފޫޒު ފޯރުވަން މަސައްކަތް ކޮށްފައިއޮތުމަކީ ނާއިންސާފެއް ކަމުގައެވެ.