މާލޭގެ ސްކޫލްތަކަށް އަމާޒުކޮށްގެން ނެޓްބޯޅަ އެސޯސިއޭޝަނުން ކުރިއަށްގެންދާ، އިންޓަރސްކޫލް ދެމުބާރާތްކަމުގައިވާ ޓީޗަރުންގެ 3 ވަނަ ނެޓްބޯޅަ މުބާރާތާއި، ބެލެނިވެރިންގެ 7 ވަނަ ނެޓްބޯޅަ މުބާރާތުގައި ރޭވެސްވަނީ މެޗެއް ކުޅެފައެވެ.

ރޭ ކުޅުނު މެޗްގައި ބައްދަލްކުރި ދެޓީމަކީ އިސްކަންދަރު ސްކޫލްގެ ޓީޗަރުންގެ ޓީމާއި، މާފަންނު މަދަރުސާގެ ޓީޗަރުންގެ ޓީމެވެ. މިމެޗް 27 ޕޮއިންޓް 22 ޕޮއިންޓުން ކާމިޔާބުކުރީ އިސްކަންދަރު ސްކޫލްގެ ޓީޗަރުންގެ ޓީމުންނެވެ. މެޗްގެ މޮޅު ކުޅުންތެރިޔާއަށް ހޮވުނީ، މެޗް ކާމިޔާބުކުރި، އިސްކަންދަރު ސްކޫލްގެ ނުހުޒާ އިބްރާހިމްއެވެ. އޭނާވަނީ ބަޔަށް ޖުމްލަ 20 ޕޮއިންޓް ކާމިޔާބު ކޮށްދީފައެވެ. މެޗުން ބަލިވި މާފަންނު މަދަރުސާގެ ޓީމުން ބަޔަށް އެންމެގިނަ ޕޮއިންޓް ކާމިޔާބުކޮށްދިން ކުޅުންތެރިޔަކީ، މަދިހާ އަބްދުލް ރަހްމާންއެވެ. އޭނާވަނީ ޖުމްލަ 19 ޕޮއިންޓް ކާމިޔާބު ކޮށްދީފައެވެ.

ނެޓްބޯޅަ އެސޯސިއޭޝަނުން މައުލޫމާތު ދެއްވާގޮތުގައި، ރޭ ކުޅުމަށް ހަމަޖެހިފައިވާ ސެމީފައިނަލްގެ ފުރަތަމަމެޗް ގްރޫޕް 2 ގެ ތިން ޓީމެއް އެއްވަރުވެ، ގްރޫޕް 2 ވަނަ ޓީމް ހޮވަން އިތުރު މެޗެއް ކުޅެން ޖެހުމުގެ ސަބަބުން، އެމެޗް މިހާރު ކުޅުމަށް ހަމަޖެހިފައިވަނީ މިރޭ 10:00 ގައެވެ. އެހެންކަމުން ރޭ ކުޅެފައިވަނީ ގްރޫޕް 2 ގެ 2 ވަނަ މަޤާމް ހޮވުމުގެގޮތުން ކުޅެފައިވާ ނޮކްއައުޓް މެޗެކެވެ. އެގޮތުން އެމެޗް ކާމިޔާބުކޮށް ގްރޫޕްގެ ދެވަަނަ ޓީމެއްގެގޮތުގައި ހޮވިފައިވަނީ ކަލާފާން ސްކޫލްއެވެ.