ޗެމްޕިއަންސް ލީގްގައި ރޭވެސްވަނީ މުހިންމު ދެމެޗެއް ކުޅެފައެވެ. ރޭކުޅުނު ދެމެޗުގެތެރެއިން ފުރަތަމަ މެޗުގައި ބައްދަލުކުރީ މެންޗެސްޓަރ ޔުނައިޓެޑްއާއި އޭސީ މިލާންއެވެ. ދެވަނަ މެޗުގައި ބައްދަލުކުރީ ރެއާލް މެޑްރިޑާއި ލިޔޯންއެވެ.

މިދެމެޗްގެ ތެރެއިން އެންމެ ފާހަގަކޮށްލެވުނު މެޗަކީ، މެންޗެސްޓަރ ޔުނައިޓެޑްއާއި މިލާން ބައްދަލުކުރި މެޗެވެ. މިމެޗް ނިމިގެން ދިޔައީ 4-0 ލަނޑުން މެންޗެސްޓަރ ޔުނައިޓެޑް މެޗް ކާމިޔާބު ކޮށްގެންނެވެ.

ރޭގެ މެޗްގައި މޮޅު ކުޅުމެއްދެއްކި ަ މެންޗެސްޓަރ ޔުނައިޓެޑްގެ ފުރަތަމަ ލަނޑުޖަހާ، ލީޑް ހޯދައިދިނީ މެޗްގެ ފުރަތަމަހާފްގެ 13 ވަނަ މިނެޓްގައެވެ. އެލަނޑު މެންޗެސްޓަރއަށް ކާމިޔާބުކޮށްދިނީ އިގިރޭސި ގައުމީ ޓީމްގެ ހުނަރުވެރި ފޯވާޑް ވޭން ރޫނީއެވެ. މެޗްގެ ފުރަތަމަ ހާފްގައި މެންޗެސްޓަރ ޔުނައިޓެޑްއިން ގޯލެއްޖަހާ ލީޑް ހޯދުމުން، މިލާންގެ ކުޅުންތެރިންގެ ފަރާތުން ހާސްކަން ފެނިގެންދިޔަކަން ފާހަގަ ކުރެވުނެވެ.

މެޗްގެ ފުރަތަމަ ހާފް ނިމިގެންދިޔައިރުވެސް ކުރީގައިއޮތީ މެންޗެސްޓަރ ޔުނައިޓެޑްއެވެ. ދެވަނަ ހާފަށް ދެޓީމްވެސް ނުކުތީ ފުރަތަމަހާފްގައި ދެޓީމްގައިވެސް ކުޅުނު ކުޅުންތެރިންނާއެކުގައެވެ.

ދެވަނަ ހާފްގެ ކުޅުން ފެށިގެން ފުރަތަމަ މިނެޓްގައި ފެނިގެންދިޔައީ، މިލާންގެ ގޯލަށް މެންޗެސްޓަރ ޔުނައިޓެޑްއިން ގޯލެއް ޖެހިތަނެވެ. އެގޯލް ކާމިޔާބުކޮށްދިނީ، ފުރަތަމަ ހާފްގައިވެސް ޔުނައިޓެޑްއަށް ގޯލް ކާމިޔާބުކޮށްދިން ވޭން ރޫނީއެވެ. ޔުނައިޓެޑްއިން ދެގޯލްޖަހާ ކުރިހޯދުމާއެކު މިލާންގެ ކުޅުންތެރިންގެ ފަރާތުން މާއެދެވޭ ކުޅުމެއް ފެނިގެން ނުދާކަންވެސް ފާހަގަކުރެވުނެވެ.

ރޭގެ މެޗްގައި ޔުނައިޓެޑްއިންޖެހި އެޓީމްގެ ތިންވަނަ ގޯލް ޖަހާފައިވަނީ މެޗްގެ 59 ވަނަ މިނެޓްގައެވެ. އެލަނޑު އެޓީމަށް ކާމިޔާބުކޮށްދިނީ ޕާކްއެވެ. ޔުނައިޓެޑުންޖެހި އެޓީމްގެ އެންމެފަހުގޯލް ޖަހާފައިވަނީ މެޗްގެ 87 ވަނަ މިނެޓްގައި ފްލެޗަރއެވެ.

ރޭގެ މެޗުން އޭސީމިލާން ބަލިވުމުން އެޓީމަށްވަނީ މިމުބާރާތުގެ ކުއާޓަރ ފައިނަލް ކުޅުމުގެ ފުރުސަތުވެސް ގެއްލިފައެވެ. ރޭގެ މެޗުން މިލާން ބަލިވުމުން ދުނިޔޭގެ ވަރަށްގިނަ މީޑިޔާތަކުގެ ފާޑު ކިޔުން އެޓީމަށް ރައްދުވެފައިވެއެވެ. ބައެއް މީޑިޔާތަކުން ބުނެފައިވަނީ، ރޭގެ މެޗުން ބަލިވުމުގެ އަސްލަކަށްވީ، ބޮޑު ޚަރަދުކޮށްގެން ބެކަމް ޓީމަށް ގެނައުންކަމުގައެވެ.

ރޭ ކުޅެނު ދެވަނަ މެޗްގައި ރިއާލް މެޑްރިޑާއި ލިޔޯން ބައްދަލުކުރިމެޗް ނިމިގެން ދިޔައީ 1-1 ން ދެޓީމު އެއްވަރު ވެގެންނެވެ.