ދިވެހިރާއްޖެއިން ޢާންމު ޞިއްޙަތަށްދޭ ސަމާލުކަމަށް ދުނިޔޭގެ ޞިއްޙަތު ޖަމިއްޔާގެ ވެރިޔާ މާގަރެޓް ޗޭން ތަޢުރީފު ކުރައްވައިފިއެވެ.

ރާއްޖޭގެ ދަޢުވަތަކަށް މިހާރު ރާއްޖެ ވަޑައިގެންއުޅުއްވާ ޗޭން މިއަދު ހެލްތް މިނިސްޓްރީގައި ނޫސްވެރިންނާއި ބައްދަލުކުރައްވައި ވިދާޅުވީ، ޑަބްލިޔު.އެޗް.އޯއިން ރާއްޖޭގެ ޞިއްޙީ ދާއިރާ ހަރުދަނާކޮށް ދެމެހެއްޓުމަށްޓަކައި ބޭނުންވާ އިންސާނީ ވަސީލަތާއި، ހޭލުންތެރި ކުރުވުމުގެ މަޝްރޫޢުތަކަށް އެހީވުމުގެ މަސައްކަތް ކުރަމުންދާކަމުގައެވެ.

ޗޭން ވިދާޅުވިގޮތުގައި 2000 ވަނަ އަހަރު ދުނިޔޭގެ ލީޑަރުން ޞިއްޙީ މައްސަލަތަކާއިމެދު ކަނޑައެޅުއްވި ވަރަށްގިނަ ކަންތައްތަކެއް ރާއްޖެއިން ޙާޞިލު ކޮށްފިއެވެ. އެހެންނަމަވެސް ރާއްޖޭގެ ސަރުކާރަށާއި، ރައްޔިތުންނަށް އެކަމަނާ ގޮވާލެއްވީ، ރާއްޖޭގައިމިއޮތް ޞިއްޙީ ރައްކާތެރިކަން ދެމެހެއްޓުމުގައި، އެންމެންގެ އެއްބާރުލުން ބޭނުންވާކަމަށާއި، ސަރުކާރުން ސިޔާސަތު ކަނޑައެޅުމުގައި ބަލަންޖެހޭ ކަންތައްތަކަށް ސަމާލުކަން ދިނުމަށެވެ.

ނޫސް ެރިޔަކު ދެންނެވި ސުވާލަކަށް ޖަވާބު ދެއްވަމުން އެކަމަނާ އިތުރަށް ވިދާޅުވީ، ޑަބްލިޔު.އެޗް.އޯއިން ރާއްޖެއަށް ވަރަށްގިނަ އެހީތަކެއް ވެދެއެވެ. އެހެންނަމަވެސް ޑަބްލިޔު.އެޗް.އޯއަކީ މާލީ އިދާރާއެއް ނޫންކަމަށާއި، ނަމަވެސް ޢާންމު ޞިއްޙަތާއި ގުޅުންހުރި ކަންކަމުގައި، މީހުން ހޭލުންތެރިކުރުވުމާއި، ޞިއްޙީގޮތުން ދެވިދާނެ ގިނަ އެހީތަކެއް ރާޖެއަށްވެސް ކަނޑައެޅޭކަމުގައެވެ. އެގޮތުން ނުރައްކާތެރި ބަލިތަކާއި ބެހޭގޮތުން ދެނެގަތުމާއި، އެކަމުން ކުރާނެ އިޤްތިޞާދީ އަދި އިޖްތިމާޢީ ނުރަނގަޅު އަސަރުތަށް ކުޑަކުރުމުގައި އެއްބާރުލުންދީ، އެފަދަ މަޝްރޫޢުތަކުގައި ލަފަޔާއި އިރުޝާދު ދެވޭނެކަމުގައެވެ.