ދީނީ އެއްބައިވަންތަކަން ހިމާޔަތްކުރުމުގެ ގާނޫނުގެ ދަށުން ހެދިފައިވާ ގަވާއިދު އިސްލާހްކުރުމުގެ މަސައްކަތް އަނެއްކާވެސް ފަށްޓަވައިގެން ކުރިއަށް ގެންދަވާކަމުގައި މިނިސްޓްރީ އޮފް އިސްލާމިކް އެފެއަރޒްއިން ހާމަކުރައްވައިފިއެވެ.

އެމިނިސްޓްރީން ވިދާޅުވީ، މިމަސައްކަތް އަލުން އަނެއްކާވެސް މިފެށްޓެވީ، އެގަވާއިދު އެކުލަވާލުމަށްފަހު އެޓާރނީ ޖެނެރަލްގެ އޮފީހަށް ފޮނުވުމުން، ޤަވާޢިދުގެ ބައެއް މާއްދާތައް އިސްލާހްކުރުމަށް އޭ.ޖީ އޮފީހުން އެންގެވުމުން ކަމަށެވެ.

ނަމަވެސް އޭޖީ އޮފީހުން އިސްލާޙްކުރެއްވުމަށް އެންގެވީ ކޮން މާއްދާތަކެއްކަމެއް އިސްލާމިކް މިނިސްޓްރީން ހާމައެއް ނުކުރައްވައެވެ. މިގަވާއިދު އިސްލާހްކުރުމަށްފަހު މިހަފްތާގެތެރޭގައި އޭޖީ އޮފީހަށް އަލުން ފޮނުއްވޭނެކަމަށްވެސް އެމިނިސްޓްރީން ވިދާޅުވެއެވެ.

ދީނީ އެއްބައިވަންތަކަން ހިމާޔަތްކުރުމުގެ ގާނޫނުގެ ދަށުން ހެދިފައިވާ ގަވާއިދަށް އަމަލުކުރަން ފެށުމުން، ވަކިޖަމާއަތް ހަދައިގެން ނަމާދުކުރުން ހުއްޓުވުމާއި، ރާއްޖޭގައި އެހެންދީންތަކަށް ގޮވާލުމާއި، އެހެން ދީންތަކުގެ އަޅުކަންކުރާ ތަންތަންހެދުން ހުއްޓުވުންފަދަ ކަންތައްތައް ކުރެވޭނެކަމަށް އިސްލާމިކް މިނިސްޓްރީން ވިދާޅުވެފައިވެއެވެ.