ޔަންގޯން: މިޔަންމާގެ ވެރިކަންކުރާ އަސްކަރީ ޖުންތާއިން އާއިންތިޚާބީ ގާނޫނެއް އެކުލަވާލައި، އެގާނޫނުގެ ދަށުން މިޔަންމާގެ އިންތިޚާބު 90 އިގެ ތެރޭގައި ކާމިޔާބުކުރެއްވި އިދިކޮޅު ލީޑަރު އޮންސޮން ސޫޗީއަށް އިންތިޚާބުގައި ބައިވެރިވުން މަނާކޮށްފިއެވެ. މިއަހަރު މިޔަންމާގައި ބާއްވާނެކަމަށް ޖުންތާއިންބުނި އިންތިޚާބުގައި ސޫޗީއަށް ބައިވެރިނުވެވޭނެގޮތް މިހެދީ އޭނާއަށް އެއްވެސް ސިޔާސީ ޕާޓީއަކާ ގުޅުމަށް ހުރަސްއަޅައިގެންނެވެ.

އިންތިޚާބާއިބެހޭ ގާނޫނުގެ ސިޔާސީ ޕާޓީތައް ރަޖިސްޓްރީ ކުރުމާއިބެހޭ ބައިގައި ހިމަނާފައިވަނީ ކޯޓެއްގެ އަމުރަކުން ކުށްވެރިވެފައިވާ އެއްވެސްމީހަކަށް ސިޔާސީ ޕާޓީއެއްގައި ބައިވެރި ނުވެވޭނެ ކަމުގައެވެ.

ފާއިތުވި 20 އަހަރު ދުވަހުގެތެރެއިން 14 އަހަރު ސޫޗީ ހޭދަކޮށްފައިވަނީ ބަންދުގައެވެ. އަދި އެންމެފަހުން ސޫޗީ ކުއްވެރިވެފައިވަނީ ގޭބަންދުގައި ހުއްޓާ ގާނޫނު މަނާކުރާ ކުށެއް އަނެއްކާވެސް ކޮށްގެންކަމަށް ބުނެފައެވެ. އެއީ މިދިޔައަހަރުގެ އޯގަސްޓްމަހު ގޭބަންދުގެ ހުކުމެއް ތަންފީޒުވަމުންދަނިކޮށް އެމެރިކާ މީހަކު ސޫޗީގެ ގެއަށް ވަނުމުގެ ސަބަބުންނެވެ.

އަދި ހުސްވިއަހަރު ނޮވެމްބަރުމަހު ސޫޗީގެ ގޭބަންދުގެ މުއްދަތު އިތުރުކޮށް ސޫޗީއަށް އިންތިޚާބުގައި ބައިވެރިވުން މަނާވެގެންދާނެ ގޮތްތަކެއް ޖުންތާއިން ނިންމާފައިވާކަމަށް ބެލެވިފައިވެއެވެ.