ހިފާފައިވާގުދުސް: އީރާންދެކެ އިސްރާއީލު ގަންނަ ބިރާއި، އީރާނަށް ހަމަލާދިނުމަށް އެކި ސިފަސިފައިގާ ދުނިޔޭގެ ކުރިމަތީގައި އަގުވެއްޓެމުންދާ އިސްރާއީލުންކުރާ މަސައްކަތުގައި އިސްރާއީލުގެ ހިމާޔަތަށް އަނެއްކާވެސް އެމެރިކާ ތެދުވެއްޖެކަން ދައްކައިފިއެވެ. އެގޮތުން އެމެރިކާގެ ނައިބުރައީސް ޖޯބިޑެން ވިދާޅުވީ، އިސްރާއީލަށް ސަލާމަތީ ރައްކާތެރިކަން ދިނުމަށް އެމެރިކާއޮތީ އިހުބުނިގޮތުގައި ވެގެންނެވެ. އަދި ފަލަސްތީނާއި އިސްރާއީލާދެމެދު ވާހަކަ ދެއްކުމަށް ވެވިފައިވާ އެއްބަސްވުމަކީ ސުލްހައަށް ފައިވެފައިވާ މަގެއްކަމުގައެވެ.

އެމެރިކާއިން އިސްރާއީލުގެ ހިމާޔަތަށް ތައްޔާރުވެއްޖެކަން އެނގުމާއިއެކު އިސްރާއީލުން ނިޔުޔޯކަށް ދަތުރުކުރި ޖެނެރަލަކު އެމެރިކާއަށް ގޮވާލާފައިވަނީ، އީރާންގެ ނިއުކްލިއަރ ޕްރޮގްރާމް ހުއްޓުވުމުގެނަމުގައި ހުރިހާ ބާރެއްގެ ބޭނުން އީރާނާއި ދެކޮޅަށް ކުރުމަށެވެ. އަނެއްކޮޅުން ފަލަސްތީނުގެ ރައީސް މަހްމޫދު އައްބާސް އަރަބި ލީގުގެ ވެރިޔާ އަމްރު މޫސާއަށް ފޯނުކުރައްވާ އެދިވަޑައިގަތީ، އަރަބީންގެ އެންމެންގެ އެއްބާރުލުންދީގެން އިސްރާއީލުން ހިފާފައިވާ ފަލަސްތީނުގެ ބިންތަކަށް އިސްރާއީލު ވެރިވެގަތުން ހުއްޓުވައިދިނުމަށެވެ. އެގޮތުން ހުޅަނގު އައްސޭރީގައި އަލަށް އެޅުމަށް އިސްރާއީލުން ނިންމާފައިވާ 1،600 ގެ އިސްރާއީލުން ބިނާކުރުން ހުއްޓުވައިދިނުމަށްވެސް އެދިވަޑައިގެންފައިވެއެވެ.

އައްބާސްއާއި އަމްރު މޫސާގެ މިމަޝްވަރާގައި އައްބާސްވަނީ، އިސްރާއީލުގެ އަރައިގަތުން ހުއްޓުވުމަށްޓަކައި ވަގުތުން ކަނޑައެޅި ސިޔާސަތުތަކެއް އެކަށައަޅައި، އިސްރާއީލުގެ ވިގަނިކަން ފިލުވުމަށްވެސް ވާހަކަދައްކާފައިވެއެވެ.