ޔޫތް ހެލްތް ކެފޭގެ ފަރާތުން ޒުވާނުންނަށް އަމާޒުކޮށްގެން "ތީމެޓިކް އައުޓްރީޗް" ޕްރޮގްރާމްތަކެއް ބޭއްވުމަށް ހަމަޖެހިއްޖެކަމަށް ކުޅިވަރާބެހޭ މިނިސްޓްރީން ބުނެފިއެވެ.

ކުޅިވަރާބެހޭ މިނިސްޓްރީން މައުލޫމާތު ދެއްވާގޮތުގައި، މިޕްރޮގްރާމް ބޭއްވުމަށް ހަމަޖެހިފައިވަނީ މާލޭގެ އެކިސަރަހައްދުތަކުގައިއުޅޭ ޒުވާނުންނަށް އަމާޒުކޮށްގެން ކަމަށެވެ. އެގޮތުން ގަލޮޅު އެކްޓިވިޓީ ސެންޓަރަށްދާ ޒުވާނުންނަށާއި، ބުރު ޕާރކަށް އައިސްގޮސްއުޅޭ ޒުވާނުންނަށާއި، ރާޅުގަނޑު ސަރަޙައްދަށް ގޮސްއުޅޭ ޒުވާނުންނަށްވެސް މިޕްރޮގްރާމް ހިންގުމަށް ހަމަޖެހިފައިވެއެވެ.

މިޕްރޮގްރާމްގެ ފުރަތަމަ ބުރު ޕާރކްގައި މިއަދުވަނީ ހިންގާފައެވެ. ގަލޮޅު އެކްޓިވިޓީ ސެންޓަރަށްދާ ޒުވާނުންނަށް މިޕްރޮގްރާމް ހިންގުމަށް ހަމަޖެހިފައިވަނީ މާދަމާއެވެ. އަދި ހުޅުމާލޭގައި ހުންނަ މިނީ އެކްޓިވިޓީސް ސެންޓަރުގައި މިޕްރޮގްރާމް ހިންގުމަށް ހަމަޖެހިފައިވަނީ މިމަހު 14 ވަނަ ދުވަހުއެވެ.

މިޕްރޮގްރާމްގައި މަޢުލޫމާތުދޭނީ ފުރާވަރު ޢުމުރުގެ ކުދިންނަށް ދިމާވާ މައްސަލަތަކާއި ބެހޭގޮތުންނާއި، ޖިންސީގުޅުންމުން އަރާ ބަލިތަކާއި އެޗް.އައި.ވީ އެއިޑްސްއާއި ބެހޭގޮތުންނެވެ.

މިޕްރޮގްރާމްގައި މަޢުލޫމާތު ދިނުމަށް ހަމަޖެހިފައިވަނީ ކަމުގެ ތަމްރީން ލިބިފައިވާ، ޤާބިލް ދެޖިންސުގެ ޒުވާނުންނެވެ.