އެމްއެންޑީއެފް ކޯސްޓްގާޑުގެ ޚިދުމަތާއި އަލަށް ގުޅުނު ސިފައިންނަށް ހިންގި 10 ވަނަ ކޯސްޓްގާޑު ބޭސިކް ކޯސް ނިންމުމުގެ ރަސްމިއްޔާތު ރޭ ބާއްވައިފިއެވެ. ކަޅުތުއްކަލާކޮށީ ހެވިކަމުގެ މައިދާނުގައި ބޭއްވި މިރަސްމިއްޔާތު ޝަރަފުވެރިކޮށްދެއްވީ އެމްއެންޑީއެފް މެރިންކޯގެ ކޮމަޑާންޓް ބްރިގޭޑިއާރ ޖެނެރަލް އަޙުމަދު ޝިޔާމްއެވެ.

މިރަސްމިއްޔާތުގައި ކޯހުގެ ދަރިވަރުންގެ ހެވިކަން ދައްކާލާފައިވެއެވެ. އަދި ދަސްވެނިންނަށް ކޯސްޓްގާޑުގެ ބެޖު ހަވާލުކޮށްދިނުމާއި ވަނަވަނައަށްދިޔަ ފަރާތްތަކަށް ތައްޓާއި ހަނދާނީލިޔުން ޙަވާލުކޮށްދިނުން އޮތެވެ.

ތިންމަސްދުވަހުގެ މުއްދަތަށް ހިންގި މިކޯހުގެ އެއްވަނަ ދަރިވަރަކަށް ހޮވިފައިވަނީ ޕްރައިވެޓް މުޙައްމަދު ޝަހުމްއެވެ. ސްޓާރ ބޯޑް ޕްލެޓޫންގެ އެންމެ ރަނގަޅު ދަރިވަރަކަށް ޕްރައިވެޓް އިބްރާހީމް ޙާނީ އަޙުމަދު ހޮވުނުއިރު، ޕޯޓް ޕްލެޓޫންގެ އެންމެ ރަނގަޅު ދަރިވަރަކަށް ހޮވިފައިވަނީ ޕްރައިވެޓް މުޙައްމަދު ޔާމީންއެވެ. ކިޔަވައިދެވުނު މާއްދާތަކުން އެއްވަނަ ދަރިވަރަކަށް ހޮވިފައިވަނީ ޕްރައިވެޓް އަޙުމަދު ރިފްޝާން މުޙައްމަދުއެވެ. ވަނަވަނައަށް އައި ފަރާތްތަކަށް ތައްޓާއި ހަނދާނީލިޔުން ހަވާލުކޮށްދެއްވީ ޝަރަފުވެރި މެޙުމާން ބްރިގޭޑިއަރ ޖެނެރަލް އަހްމަދު ޝިޔާމް އެވެ.

2009 ވަނަ އަހަރުގެ ޑިސެމްބަރ މަހުގެ 10ން 2010 ވަނަ އަހަރުގެ މާރޗްމަހުގެ 4 ވަނަ ދުވަހާއި ހަމައަށް ކުރިއަށްގެންދިޔަ މިކޯހުގައި 56 ދަރިވަރުން ބައިވެރިވެ ފާސްވެފައިވެއެވެ. ގިރިފުށީ ޓްރޭނިންގ ސެންޓަރުގައާއި މާލޭގައި ހިންގި މިކޯހުގައި ކިޔަވައިދެވުނު މާއްދާތަކުގެ ތެރޭގައި ހަށިހެޔޮކަމާއި، ނިޔަމިކަމާއި، ފަސްޓްއެއިޑާއި ނޭވަލް ކޮމިޔުނިކޭޝަނާއި ކަނޑުގެ ޤާނޫނާއި އަދި ސިފައިންގެ ޤާނޫނާއި ޤަވާއިދުތައް ހިމެނެއެވެ. މީގެއިތުރުން ދިވެހިރާއްޖޭގެ ޖިއޮގްރަފީ އާއި މީޓިއޮރޮލޮޖީއާއި ޗާޓްވޯކާއި ސީމަންޝިޕާއި ބޯޑިންއާއި ފަޔަރ ފައިޓިންގއާއި ސާޗް އެންޑް ރެސްކިޔުއާއި އިންފޮމޭޝަން ޓެކްނޮލޮޖީއާއި އިންޖިނިއަރިން އަދި އިލެކްޓްރިކަލް އިންޖިނިއަރިންގ އަސާސީ ފެންވަރަށް ވަނީ ދަސްކޮށްދީފައެވެ.

މީގެއިތުރުން ދީނަށް ހޭލުންތެރިކުރުވުމުގެ ޕްރޮގްރާމްތަކާއި، ބައެއް ސީނިއަރ ބޭފުޅުންގެ ލެކްޗަރތަކާއި، ސަވައިވަރ ޓެކްނިކްސް އަދި ކޯސްޓްގާޑު ސަބް ޔުނިޓްތަކުގެ ތަޢާރަފް ދަރިވަރުންނަށް ކިޔައިދީފައިވެއެވެ.
މިކޯސް ނިންމުމުގެގޮތުން ރޭ ބޭއްވެވި މިރަސްމިއްޔާތުގައި ކޯސްޓްގާޑުގެ ޑައިރެކްޓަރ މޭޖަރ މުޙައްމަދު އިބްރާހިމްއާއި، ސިފައިންގެ އޮފިސަރުންނާއި، އެކި ރޭންކުތަކުގެ ސިފައިންގެ އިތުރުން ކޯހުގެ ދަރިވަރުންގެ އާއިލާތަކުގެ ބޭފުޅުން ބައިވެރިވެވަޑައިގެންނެވިއެވެ.