ބައިނަލް އަޤްވާމީ އަންހެނުންގެ ދުވަސް ފާހަގަކުރުމުގެ ގޮތުން މޯލްޑިވްސް ޕޮލިސް ސަރވިސްގެ އަންހެން ފުލުހުން އިސްނަގައިގެން ހިންގި ޚާއްސަ ޗެރިޓީ ފުޓްބޯޅަ ޓޯނަމެންޓުން ލިބުނު ފައިސާ މާފުށީގައި ހުންނަ ތަޢުލީމާއި ތަމްރީނު އުނގަންނައިދޭ ކުޑަކުދިންގެ މަރުކަޒަށް ހަދިޔާކޮށްފިއެވެ.

އިއްޔެ ހަވީރު ގަލޮޅު ދަނޑުގައި ޓިކެޓް ވިއްކައިގެންނާއި އަދި ދަނޑުގައި ބެހެއްޓިފައިހުރި ފަންޑު ފޮށްޓަށް ލިބުނު ޖުމްލަ 21650.35 ރ (އެކާވީސްހާސް ހަސަތޭކަ ފަންސާސް ރުފިޔާ ތިރީސްފަސް ލާރި) އެސެންޓަރާއި ހަވާލުކޮށްދެއްވީ އިއްޔެ ޓޯނަމެންޓްގައި ބައިވެރި 4 ޓީމުގެ ކެޕްޓަނުންނެވެ. އަދި މިފައިސާއާއި ސެންޓަރުގެ ފަރާތުން ހަވާލުވެވަޑައިގެންނެވީ އެތަނުގެ ޕްރިންސިޕަލް އަޙުމަދު ޝަފީޤުއެވެ.

އަންހެނުންނަށް ޚާއްސަކޮށްގެން ކުރިއަށް ގެންދިޔަ މިހަރަކާތުގައި ފުލުހުންގެ އިތުރުން ބައިވެރިވެފައިވަނީ މޯލްޑިވްސް ކަސްޓަމްސް ސަރވިސްއާއި، އައިލެންޑް އޭވިއޭޝަން، އަދި ޑިޕާރޓްމަންޓް އޮފް އިމިގްރޭޝަން އެންޑް އެމިގްރޭޝަނުންނެވެ. މިމުބާރާތުގެ ފައިނަލް މެޗުގައި އިމިގްރޭޝަނާއި ޕޮލިސް ބައްދަލުކުރި މެޗް 1 ލަނޑު 0 ލަނޑުން ކާމިޔާބުކޮށް މުބާރާތުގެ ޗެމްޕިއަންކަން ހޯދީ އިމިގްރޭޝަންޓީމެވެ.

ފައިނަލް މެޗަށް ފަހު މުބާރާތުން ވަނަވަނައަށް އައި ފަރާތްތަކަށާއި މުބާރާތުގައި ބައިވެރިވި ޓީމްތަކަށް ތައްޓާއި ހަނދާނީ ލިޔުން ބައްސަވާދެއްވީ މިނިސްޓަރ އޮފް ހެލްތް އެންޑް ފެމެލީ ޑރ. އައިމިނަތު ޖަމީލް އާއި ކޮމިޝަނަރ އޮފް ޕޮލިސް އަޙުމަދު ފަސީހް އެވެ. މުބާރާތުގެ ކްއީން އޮފް ދަ ޓޯނަމަންޓަކަށް ހޮވުނީ އިމިގްރޭޝަންގެ ފަދުވާ ޒާހިރެވެ.

އިއްޔެ ގަލޮޅު ދަނޑުގައި ބޭއްވި މިހަރަކާތް ޝަރަފުވެރިކޮށްދެއްވީ މިނިސްޓަރ އޮފް ހެލްތް އެންޑް ފެމެލީ ޑރ. އައިމިނަތު ޖަމީލްއެވެ.

މިރަސްމިއްޔާތުގައި މިނިސްޓަރ އޮފް ހޯމްއެފެއަރޒް މުޙައްމަދު ޝިހާބް އާއި، ކޮމިޝަނަރ އޮފް ޕޮލިސް އަޙުމަދު ފަޞީހް އާއި މިޙަރަކާތުގައި ބައިވެރިވި މުއައްސަސާތަކުގެ އިސްވެރިންގެ އިތުރުން ގިނަ އަދަދެއްގެ އާއްމު ރައްޔިތުންވެސް ބައިވެރިވިއެވެ.