ބީޖިންގ: ޗައިނާގެ ސިއްހަތާއިބެހޭ އޮފިޝަލުން ބެއްލެވި ބެއްލެވުމެއްގައި ޗައިނާގައި ގެރިކިރުގެ ބާވަތްތަކުން އުފައްދާ ބާޒާރަށް ނެރެފައިވާ ކިރުގައި މެލަމައިން ވިހައިގެ އަސަރު ހުރިކަމަށް ފާހަގަ ކުރެވިގެން ކިރުގެ ބާވަތްތައް އުފައްދާ ކާރުޚާނާތަނެއް ބަންދުކޮށްފިއެވެ.

މިމެލަމައިންއަކީ ޗައިނާގައި 2008 ގައި ފެނިފައިވާ ކިރުގެ ބާވަތްތަކާއި ތަޣައްޔަރުވެގެން އެކިރު ބޭނުންކުރި 68 ކުދިން މަރާލާފައިވާ ވިހައެކެވެ.

އިނިސްޕެކްޓަރުންވަނީ ޗައިނާގެ ހުޅަނގު އުތުރު ސަރަހައްދުން 72 ޓަނުގެ ހިކިކިރުގައި މެލަމައިން ވިހަ ހުރެގެން އެތަކެތި ސަރުކާރުގެ ކަމާއިބެހޭ ފަރާތްތަކުން ނައްތާލުމަށްޓަކައި ހިފަހައްޓައިފިއެވެ. މިބޭފުޅުން ވިދާޅުވިގޮތުގައި މިހާރުވެސް މިގޮތަށް ތަޣައްޔަރުވެފައިވާ 100 ޓަނަށްވުރެ ގިނަ ހިކިކިރު ބާޒާރުގެ ފިހާރަތަކުގައި ވެދާނެކަމުގައި އެތަކެތި ފިހާރަތަކުން ނެގުމުގެ މަސައްކަތް ކުރަމުންދާ ކަމުގައިވެސް ވިދާޅުވިއެވެ.

ޗައިނާގައި މިފަހަކަށްއައިސް ވަރަށްގިނަ އަދަދަކަށް މެލަމައިންއިން ކަޅިވެފައިވާ ކިރުގެ ބާވަތްތައް ވިއްކާކަމުގެ ރިޕޯޓް ލިބިފައިވެއެވެ. އަދި ބައެއް ނޫސްތަކުގައި މިވާހަކަ ލިޔަމުންދާއިރު ކުރިންވެސް މިގޮތަށް ތަޣައްޔަރުވެފައިވާ ކިރުގެ ވާހަކަ ދެއްކިނަމަވެސް ނައްތާނުލާހުރި ތަޣައްޔަރުވެފައިވާ ކިރު ވިއްކާ ވާހަކަވެސް ހާމަކޮށްފައިވެއެވެ. މިކަމުގެ ސަބަބުން ޗައިނާގެ ކިރުއުފައްދާ ސިނާއަތަށްވަނީ ހީނަރުކަމެއް ވެރިވެ މީހުންގެ އިތުބާރު ގެއްލޭގޮތް ވެފައެވެ.