ތެހެރާން: ހުޅަނގުން އީރާނުގެ ނިއުކްލިއަރ ޕްރޮގްރާމް ކުރިއަށްގެންދިއުމަށް ހުރަސްއަޅައި އެކަން ހުއްޓުވުމުގެ މަސައްކަތް ކުރަމުންދާއިރު، އެކަމަށް ރައްދު ދިނުމުގެގޮތުންނާއިއެކު އީރާނުން ބުނާ ސިއްހީ ދިރާސާތަކަށް ބޭނުންވާ ނިއުކްލިއަރ އިންޖީނު ހިންގާ ހަކަތަ އުފެއްދުމަށްޓަކައި ޔުރޭނިއަމް ފައްކާކޮށް މުއްސަނދިކުރުމުގެ އަމުރު ރައީސް މަހްމޫދު އަހްމަދީ ނިޖާދު ނެރުއްވައިފިއެވެ.

އީރާނުގެ ޓީވީން ރަސްމީ ސިފައެއްގައި މިއަމުރު ނިޖާދު ނެރުއްވީ އީރާނަށް ގެނައި އިސްލާމީ އިންގިލާބަށް 31 އަހަރު ފުރުމާއިގުޅިގެން ދެއްވި ޚިޠާބުގައެވެ. އަދި މެސެޖް ނިޖާދު މިދެއްވީ އީރާނުގައި މައްސަލަތައް ބޮޑުވެ ހަމަނުޖެހުން ހިނގުމުގެބިރު ކުރިމަތިވުމާއިވެސްއެކު އީރާނަކީ ހަރުދަނާ ގައުމެއްކަމަށް ދެއްކެވުމުގެ މަސައްކަތްޕުޅު ނިޖާދު ކުރައްވަމުން ވަޑައިގަތުމުގައެވެ.

ލޭޒަރ ޓެކްނޮލޮޖީއާއި ބެހޭގޮތުން ވާހަކަދައްކަވަމުން ނިޖާދު އެންގެވީ މިހާރު އީރާނުން ފައްކާކޮށްފައިވާ ޔުރޭނިއަމް 20 އިންސައްތައަށް މުއްސަނދި ކުރުމަށެވެ. އަދި މިމައްސަލައިގާ ހުޅަނގަށް އިޝާރާތް ކުރައްވަމުން ނިޖާދު ވިދާޅުވީ، މިމައްސަލަޔާއިމެދު މަޝްވަރާ ކުރުމަށް ތައްޔާރުވުމުން އީރާނުން އެކަން ހުޅުވާލާނެ ކަމުގައެވެ. އަދި މިއީ ހުޅަނގުން އެމީހުން ބޭނުންވާ ގައުމަކަށް އީރާނުގައި ކަސްކޮށް އުފައްދާފައިވާ ޔުރޭނިއަމް ގެންގޮސްގެން މުއްސަނދި ކުރުމަށް ނިންމާފައިވާ ދަރަޖައެވެ.

އީރާނާއި އދ.ގެ ހަކަތައާއިބެހޭ އިދާރާއާއި ދެމެދު ނިއުކްލިއަރ އެއްބަސްވުމަކަށް ނާދެވިއްޖެނަމަ އީރާނުން އަމިއްލައަށް ނިއުކްލިއަރ މުއްސަނދި ކުރާނެކަމުގެ އިންޒާރު އީރާނުންވަނީ ބައިނަލްއަޤްވާމީ މުޖުތަމައަށް ދީފައެވެ.