ތެހެރާން: އީރާނުން ފުރަތަމަ ފަހަރަށް ރާޑަރަށް ނުފެނި ދަތުރުކުރާ ބާވަތުގެ މަތިންދާބޯޓެއް އުފައްދައި ތަޖުރިބާކޮށްފިކަމަށް ބުނެފިއެވެ.

އީރާނުގެ އަސްކަރީ އޮފިޝަލު އެއަރމާޝަލް ޖެނެރަލް އަޒީޒް ނާސިރު ޒާދިހް ވިދާޅުވީ "ޞަފްރާ މާހީ" ގެ ނަންދީފައިވާ ލުއި މަތިންދާބޯޓެއް ރާޑަރަށް ނާރާގޮތަށް ވަރަށް ކާމިޔާބު ދަތުރެއް އަޅައިފި ކަމުގައެވެ.

"ވެލިމަޑި" ނަމުން ނަންދީފައިވާ މިމަތިންދާބޯޓު އޭގެ ދަތުރުތަކެއް ވަރަށް ކާމިޔާބުކަމާއިއެކު ކުރީ އޭގެ ފުރިހަމަކަމާއި ގާބިލްކަމާއި އެކުގައިކަމުގައި ވިދާޅުވަމުން މިޖެނެރަލް ހާމަކުރެއްވިގޮތުގައި، ވަރަށް އަވަހަށް މީގެ ގިނަ މަތިންދާބޯޓުތަކެއް އީރާނުން ނެރޭނެ ކަމުގައެވެ. އަދި މިހާރު ކުރިއަށް ގެންދާނީ ފުރިހަމަ ބޮޑުމިނުގައި ހަތިޔާރާއިއެކު ދަތުރުކުރާ ބޯޓު އުފެއްދުމެވެ. މިކަމާބެހޭ ހުރިހާކަމެއް ނިމިފައިވާ ކަމަށާއި، މިހާރުއޮތީ އުފައްދައިގެން ނެރުން ކަމުގައެވެ.

އީރާނުންވަނީ ފާއިތުވި އަހަރުގެ ޖޫންމަހު މީހަކުނެތި އުދުހޭ މަތިންދާބޯޓެއް އުފައްދާފައެވެ. އަދި ކާމިޔާބުކަމާއިއެކު ރާޑަރަށް ނާރާ ދަތުރުކުރުމުގެ ގާބިލްކަން ލިބިފައިވާ މިއުޅަނދަކީ ބޮންއަޅާގޮތަށް ފަރުމާކޮށް އުފައްދާފައިވާ މަތިންދާބޯޓެކެވެ.

މިފަހަރު މިއުފެއްދި މަތިންދާބޯޓަކީ ޑްރޯންމޮޑެލްގެ މަތިންދާބޯޓެކެވެ. އެއީ ޑްރޯންގެ ނިސްބަތުން 7 ބައިކުޅަ އެއްބައި އަސްލު ސައިޒުންކުޑަ ދަރަޖައިގެ ބޯޓެކެވެ. އަދި ވަރަށް އަވަހަށް މީގެ އެތައް ބޯޓެއް އީރާނުގެ އަސްކަރިއްޔާގެތެރެއަށް ވަދެގެން ދާނެއެވެ.