ރައީސުލްޖުމްހޫރިއްޔާ މުޙަންމަދު ނަޝީދު، އިންޑިޔާގެ ޤާނޫނު ހަދާ މަޖިލީހުގެ މެންބަރު އަދި އޯލް އިންޑިޔާ ކޮންގްރެސް ކޮމިޓީގެ ޖެނެރަލް ސެކްރެޓެރީ ރާހުލް ގާންދީއާ މިއަދު ބައްދަލުކުރައްވައިފިއެވެ.

މިއަދު މެންދުރުފަހު ރައީސުލްޖުމްހޫރިއްޔާގެ އޮފީހުގައި ބޭއްވެވި މިބައްދަލުކުރެއްވުމުގައި، ދިވެހިރާއްޖެއާއި އިންޑިޔާއާ ދެޤައުމުގެ ދެމެދުގައިވާ ގުޅުމާ ބެހޭގޮތުން ދެބޭފުޅުން މަޝްވަރާ ކުރެއްވިއެވެ. އަދި، ޑިމޮކްރެޓިކް ނިޒާމް ހަރުދަނާ ކުރުމަށް އެޅިދާނެ ފިޔަވަޅުތަކާއި، ސިޔާސީ ނިޒާމް އިންޑިޔާގައި ބައްޓަންވެފައި އޮންނަ ގޮތާބެހޭގޮތުންވެސް ވާހަކަފުޅުދެއްކެވިއެވެ.

އިންޑިޔާއިން ރާއްޖެއާ ދޭތެރޭ ބަހައްޓަވާ ގާތްކަމަށްޓަކައި، އިންޑިޔާ ސަރުކާރަށާއި ރައްޔިތުންނަށް ރައީސުލްޖުމްހޫރިއްޔާ ޝުކުރު އަދާކުރެއްވިއެވެ. ޚާއްޞަކޮށް ރާއްޖެއަށް ޑިމޮކްރަސީ ގެނައުމަށް ކުރެވުނު މަސައްކަތުގައާއި، ރާއްޖެއަށް ދެއްވާފައިވާ މާލީ އެހީތެރިކަން، ރައީސުލްޖުމްހޫރިއްޔާ ފާހަގަކުރެއްވިއެވެ. ހަމައެއާއެކު، ދިވެހިންގެ ސިއްޙީ ދުޅަހެޔޮކަމަށްވެސް އިންޑިޔާއިން ވަރަށްބޮޑު އެހީތެރިކަމެއް ރާއްޖެއަށް ލިބިފައިވާ ކަމަށާއި، އެގޮތުން މާލޭގައި ހުންނަ އެންމެބޮޑު ހޮސްޕިޓަލު ކަމުގައިވާ އިންދިރާ ގާންދީ މެމޯރިއަލް ހޮސްޕިޓަލަކީ، އިންޑިޔާ ސަރުކާރުގެ ވަރަށް ދީލަތި އެހީތެރިކަމާއެކު ބިނާކުރެވިފައިވާ ހޮސްޕިޓަލެއް ކަމުގައި ރައީސް ވިދާޅުވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި، ރާއްޖޭގައި ޑިމޮކްރަސީ ހަރުދަނާކުރެއްވުމަށް ކުރައްވާ މަސައްކަތްޕުޅުގައި ވަރަށްގިނަ ގޮންޖެހުންތަކެއް އެބަހުރި ކަމަށާއި، އިންޑިޔާއަކީ ދުނިޔޭގައިވާ އެންމެބޮޑު ޑިމޮކްރަސީކަމަށްވުމާއެކު މިކަންކަން ޙައްލުކުރެއްވުމުގައި އިންޑިޔާގެ އެހީތެރިކަން ރާއްޖެއަށް ވަރަށްބޮޑަށް ބޭނުންތެރި ކަމުގައިވެސް ވިދާޅުވިއެވެ.

ރާހުލް ގާންދީ ދެއްކެވި ވާހަކަފުޅުގައި، ރާއްޖެ ވަޑައިގެން ރައީސުލްޖުމްހޫރިއްޔާއާ ބައްދަލުކޮށްލެއްވުމުގެ ފުރްޞަތު ލިބިވަޑައިގެންނެވި ކަމަށްޓަކައި ވަރަށްބޮޑަށް އުފާފުޅު ކުރައްވާކަމަށް ވިދާޅުވެ، ރައީސުލްޖުމްހޫރިއްޔާއަށް ޝުކުރު އަދާކުރެއްވިއެވެ. އަދި، ދިވެހިރާއްޖެއަކީ އިންޑިޔާއާ އަބަދުވެސް ވަރަށްގާތް ޤައުމެއް ކަމަށާއި، ވެދެއްވެންއޮތް ހުރިހާ އެހީއެއް އިންޑިޔާއިން ދިވެހިރާއްޖެއަށް ވެދެއްވާނެ ކަމުގައިވެސް ވިދާޅުވިއެވެ. އިންޑިޔާގެ ސިޔާސީ ނިޒާމް އޮންނަގޮތާބެހޭގޮތުންވެސް މިބައްދަލުކުރެއްވުމުގައި ރާހުލް ގާންދީ ރައީސުލްޖުމްހޫރިއްޔާއަށް މަޢުލޫމާތުދެއްވިއެވެ.