ހުޅުމާލެ ފެރީއަކާއި، ލޯންޗެއްޖެހި މިއަދު ހިނގި އެކްސިޑެންޓެއްގައި ފެރީގައިތިބި މީހުންގެ ތެރެއިން 8 މީހަކަށާއި، ލޯންޗުގެ ފަޅުވެރިއަކު ޒަޚަމްވެއްޖެއެވެ.

މިއަދު މެންދުރު 12:00 ހާއިރު މިހާދިސާ ހިނގާފައިވަނީ "ނިޔާމަ- 7" ނަމަކަށްކިޔާ ހުޅުމާލެ ފެރީ، މާލެ ކައިރީގައި އޮންނަ ފުނަދޫ ބޭރުން ބާރު ސްޕީޑުގައި ދުއްވާފައިދިޔަ "ސޮވެނިއާ 13" ލޯންޗު، ފެރީ ހުރަސްކުރަން އުޅުމުގެތެރޭގައި ފެރީގެ ދިރުނބާކޮޅުގައި ޖެހިގެންކަމަށް މިހާތަނަށް އެނގިފައިވާކަމަށް ފުލުހުންގެ މީޑިއާ އޮފިޝަލް "ހާމަ" ނޫހަށް މައުލޫމާތު ދެއްވަމުން ވިދާޅުވިއެވެ.

މިހާދިސާގައި އަނިޔާވެފައިވަނީ، ފެރީގައިތިބި 3 ކުޑަ ކުއްޖަކަށާއި ބޮޑު 8 މީހަކަށެވެ. މީގެތެރެއިން 5 މީހަކަށް ބޮޑެތި އަނިޔާތައް ލިބުނު ކަމަށާއި، ނަމަވެސް އެއްވެސްމީހަކަށް ސީރިއަސް އަނިޔާއެއް ލިބިފައިނުވާކަމަށް ފުލުހުންގެ މީޑިއާ އޮފިޝަލް ވިދާޅުވިއެވެ. އަދި އެކްސިޑެންޓްވި ލޯންޗްގެ ފަޅުވެރިޔަކަށްވެސް އަނިޔާވިކަމަށް ފުލުހުން ވިދާޅުވެއެވެ.

މިއެކްސިޑެންޓުގައި އަނިޔާވި 9 މީހަކު އޭޑީކޭއަށް ގެންގޮސް ފަރުވާ ދީފައިވެއެވެ. އޭޑީކޭއިން މައުލޫމާތު ދެއްވިގޮތުގައި، އެހޮސްޕިޓަލަށް ފަރުވާދިނުމަށް ގެނެވުނު 9 މީހުންގެތެރޭގައި ސީރިއަށް އަދި ބޮޑު ޒަޚަމެއް ނުވަތަ އަނިޔާއެއް ވެފައިވާމީހަކު ނެތް ކަމަށާއި، ފަރުވާދިނުމަށްފަހު 8 މީހަކު ދޫކޮށްލާފައިވާ ކަމަށް ބުންޏެވެ. އަދި މިއެކްސިޑެންޓްގައި ލޯންޗުން ދަތުރުކުރި މީހަކަށް ފަރުވާދެމުން އަންނަ ކަމަށްވެސް ބުންޏެވެ.

މިހާދިސާގައި ހާނީއްކަވެގެން އައީޖިއެމްއެޗަށް ގެންދިޔައީ ތިންމީހުންކަމަށް ކޯސްޓްގާޑުން މައުލޫމާތު ދީފައިވެއެވެ. މީގެތެރޭގައި އަންހެނަކާއި، ދެފިރިހެނުން ހިމެނޭކަމަށް އައިޖީއެމްއެޗުން މައުލޫމާތު ދެއްވައެވެ. މީމީހުންނަށް އައިޖީއެމްއެޗުގެ އިމަރޖެންސީ ރޫމުގައި ފަރުވާދެމުންދާކަމަށްވެސް ައުލޫމާތު ދީފައިވެއެވެ. މައުލޫމާތު ލިބިފައިވާގޮތުގައި، މިއެކްސްޑިންޓްގައި އެންމެބޮޑަށް އަނިޔާލިބުނު މީހުން ގެންގޮސްފައިވަނީ އައިޖީއެމް ހޮސްޕިޓަލަށެވެ. މައުލޫމާތު ލިބިފައިވާގޮތުގައި، ފެރީގެ ކުރީގައި އިންމީހަކު ވިއްސައިގެންގޮސް ބިއްލޫރިގަނޑުގައިޖެހި، އެމީހާގެ އެކިތަންތަން ކަފައިގެންގޮސް، އޭނާއަށްވަނީ ވަރަށްބޮޑެތި ޒަޚަމްތަކެއް ލިބިފައެވެ.

މީގެއިތުރުން ފެރީގައިހުރި 15 ވަރަކަށް ޕްލާސްޓިކް ގޮނޑި ހަލާކުވެ، ދޯނީގެ ދިރުނބާކޮޅުގެ ޗެންޗޭންވެސް ހަލާކުވެ، ދޯންނަށާއި، ލޯންޗަށްވެސްވަނީ ބޮޑެތި ގެއްލުންތަކެއް ވެފައެވެ.

މިހާދިސާ ތަހުޤީގް ކުރަމުންދާތީ މިހާދިސާއާއިބެހޭ މާބޮޑު މައުލޫމާތެއް ފުލުހުން އަދި ހާމައެއް ނުކުރައްވައެވެ.

މިހާތަނަށް ފުލުހުން މަޢުލޫމާތު ދެއްވާ ގޮތުގައި އެކްސިޑެންޓްވި ލޯންޗަކީ ރަންނާޅި ރިސޯޓުން ފަތުރުވެރިންތަކެއް ގޮވައިގެން ހުޅުލެއަށް ދިއުމަށް ދިޔަ ލޯންޗެކެވެ. ޓޫރިސްޓުން ގޮވައިގެން މާލޭ އިންޓަނެޝަނަލް އެއާޕޯޓަށް ދަތުރު ކުރަމުން ދިޔަ މި ލޯންޗަކްގައި، ހަތަރު ކުރޫންނާއި 36 ފަސިންޖަރުންނާ އެކު ލޯންޗުގައި ދަތުރު ކުރަމުން ދިޔައީ ޖުމްލަ 40 މީހުން ކަމަށް ފުލުހުން މައުލޫމާތު ދެއްވާފައިވެއެވެ. މިއެކްސިޑެންޓްވި އެމްޓީސީސީން ހުޅުމާލެއާއި މާލެ އާއި ދެމެދު އޮޕަރޭޓްކުރާ ފެރީގައި ގާތްގަނޑަކަށް 80 މީހުން ތިބޭނެ ކަމަށް އެކުންފުނިން މައުލޫމާތު ދެއްވައެވެ.

މޯލްޑިވެސް ޕޮލިސް ސާރވިސްގެ މެރިން ޕޮލިސްއިން މިހާރު ގެންދަނީ މިއެކްސިޑެންޓް އިތުރަށް ތަހްޤީޤްކުރަމުންނެވެ.