އަންކާރާ/މިއުނިކް: އީރާނުން ހުޅަނގާއިމެދު އުފެދިފައިވާ ދެކޮޅުވެރިކަން ނިމުމަކަށް ގެނައުމަށްޓަކައި އެއްބަސްވެވިދާނެ ކަމަށްބުނާ ނިއުކްލިއަރ މުޢާހަދާއާއިމެދު ހިތްހަމަޖެހޭގޮތަށް ވާހަކަ ދެއްކެވިނަމަވެސް، އީރާނުގެ ނިއުކްލިއަރ ޕްރޮގްރާމް ހުއްޓުމަކަށް ގެނައުމުގެ އެއްބަސްވުމަށް އެއްވެސް އިޝާރާތެއް ނުދައްކާކަމުގައި އެމެރިކާއާއި ޖަރުމަނުން ބުނެފިއެވެ. އަދި އީރާނަށް ހުށަހަޅާފައިވާ ނިއުކްލިއަރ މުއްސަނދި ކުރުމުގެ  ހުށަހެޅުން އީރާނުން ގަބޫލުކުރާނެކަމަށް ނުފެންނަ ކަމުގައިވެސް މިދެގައުމުން ބުނެއެވެ.

އީރާނުގެ ޚާރިޖީވަޒީރު މަނޫޝޭރް މުއްތަޤީ ވިދާޅުވިގޮތުގައި، އީރާނުން އުފައްދާފައިވާ ފައްކާކޮށްފައިވާ ޔުރޭނިއަމް މަތީފެންވަރުގެ ނިއުކްލިއަރ ހަކަތައަށް ބަދަލުކޮށް އީރާނުގެ އިންޖީނުގޭގައި ބޭނުންކުރުމުގެ އެއްބަސްވުމާއިމެދު ވަރަށް ބިނާކުރަނިވި މަޝްވރާތަކެއް އދ.ގެ ނިއުކްލިއަރ ހަކަތައާއިބެހޭ އިދާރާއާއިއެކު ދެކެވުނު ކަމުގައެވެ. މިއިދާރާގެ އާޑިރެކްޓަރ ޖެނެރަލް ޔަކިޔާ އަމާނޯ ވިދާޅުވެފައިވަނީ އީރާނާއިއެކު މިކަން އަވަސްކުރުމަށްޓަކައި މަޝްވަރާކުރަން ބޭނުން ކަމުގައެވެ.

އަމާނޯ ވިދާޅުވިގޮތުގައި، އެންމެ މުހިންމުކަމަކީ އީރާނުގައި އުފައްދާ ޔުރޭނިއަމް އެހެންތަނަކަށް ގެންގޮސް ފައްކާކޮށް މުއްސަނދިކޮށްގެން އަނބުރާ އީރާނަށް ގެނައުމާއިބެހޭ މަޝްވަރާ ދަނީ ހިނގަމުންނެވެ. ނަމަވެސް މިކަންކުރުން އަވަސްކުރަން ޖެހިފައިވާ ކަމުގައެވެ. އަދި މިގޮތަށް ނިއުކްލިއަރ ބަދަލުކުރުމާއިބެހޭ އާ ހުށަހެޅުމެއް އީރާނުން ދީފައި ނުވާކަމަށްވެސް އޭނާ ވިދާޅުވިއެވެ.