ބަގްލަދޭޝްގެ ވެރިރަށް ޑާކާގައި މިހާރު ކުރިއަށްދާ 11 ވަނަ ޝައުތު އޭޝިއަން ގޭމްސްގައި ވާދަކުރާ ރާއްޖޭގެ ޝޫޓިންގ ޓީމްވެސް މުބާރާތަށް އަލްވަދާއު ކިޔައިފިއެވެ.

މުބާރާތުގައި ހިމެނޭ ޝޫޓިންގގެ 23 އިވެންޓުގެތެރެއިން ރާއްޖެއިން ބައިވެރިވާ ހަމައެކަނި އިވެންޓުގައި ވާދަކުރި ފަސް ގައުމުގެތެރެއިން ރާއްޖެ ދިޔައީ އެންމެ ފުލަށެވެ. ކޮންމެ ގައުމަކުން ތިން ޝޫޓަރުން ޝޫޓްކުރިއިރު ވަނަ ކަނޑައަޅަނީ ތިން ޝޫޓަރުންގެ އެވްރެޖް މާކްސްއަށް ބެލުމަށް ފަހުއެވެ.

ރާއްޖޭގެ ސޫޓިންގ ޓީމަކީ މީގެކުރީން މިމުބާރާތުގައި ހަތަރު މެޑަލް ހޯދާފައި ވާޓީމެކެވެ.

ޝޫޓްކުރުމަށްފަހު ނަތީޖާ ސާފުކުރަން ތިންގަޑިއިރަށްވުރެ ގިނަވަގުތު ހޭދަވިއެވެ. މިޒަމާނުގެ ވަސީލަތްތަކުގެ ބަދަލުގައި މެނުއަލީ ނަތީޖާ އެއްކުރި މިއިވެންޓުން ރަން މެޑަލް ހޯދީ އިންޑިޔާއެވެ.

އިއްޔެގެ އިވެންޓުގެ އެންމެމޮޅު ދިހަ ޝޫޓަރުން އިންޑިވިޖުއަލް ބަޔަށް ވާދަކުރާގޮތަށް ކުރިން އޮތްނަމަވެސް ދިމާވި މައްސަލަތަކާހެދި އިންޑިވިޖުއަލް ބައި ވަކިން ނުބާއްވައި، އެބަޔަށް އިންސާފުކޮށްފައިވަނީ މިއިވެންޓުގެ ނަތީޖާއަށް ބެލުމަށް ފަހުއެވެ. އިންޑިވިޖުއަލް ބައިންވެސް ރާއްޖޭގެ ޝޫޓަރަކަށް ވަނައެއް ނުލިބެއެވެ.