އާ ދުނިޔެއަކީ، އެމެރިކާ ބައްރަށް ކިޔާ ނަމެކެވެ. އެއީ، ދުނިޔޭގެ 7 ބައްރުންކުރެ (ނުވަތަ 7 ކޮންޓިނެންޓް ނުވަތަ 7 ޤާއްރާއިންކުރެ) ދެބައްރެވެ. އުތުރު އެމެރިކާއާއި ދެކުނު އެމެރިކާއެވެ. ދެން އޮންނަނީ، ޔޫރަޕް، އޭޝިޔާ، އެފްރިކާ، އޮސްޓްރެލޭޝިއާ އަދި އެންޓާރކްޓިކާއެވެ. ދުނިޔޭގެ ބިން މި 7 ބަޔަށް ބަހާއިރު، އުތުރު އެމެރިކާއަށް ލިބެނީ 14.77 ޕަސެންޓެވެ. ދެކުނު އެމެރިކާއަށް ލިބެނީ 12.92 ޕަސެންޓެވެ. އޭޝިޔާއަށް 31.38 ޕަސެންޓެވެ. ޔޫރަޕަށް 5.68 ޕަސެންޓެވެ. އެފްރިކާއަށް 20.39 ޕަސެންޓެވެ. އޮސްޓްރެލޭޝިއާ އަށް 5.63 ޕަސެންޓެވެ. އެންޓާރކްޓިކާއަށް 9.23 ޕަސެންޓެވެ. ދެ އެމެރިކާ އެއްކޮށްލުމުން ބިމުގެ ޕަސެންޓަކީ 27.69 އެވެ. އެހެންވުމުން، އޭޝިޔާ ފިޔަވާ ދެން އެންމެބޮޑު ބައްރަކީ އާ ދުނިޔެއެވެ.

އާ ދުނިޔެ އޮންނަނީ، ޕެސިފިކް ކަނޑުގެ އިރުމަތީގައި، އެޓްލާންޓިކް ކަނޑުގެ ހުޅަނގުގައެވެ. މިއީ، ދުނިޔޭގައިވާ ބޮޑު ހަތަރު ކަނޑުގެތެރެއިން އެންމެބޮޑު ދެކަނޑެވެ. ދެން އޮންނަނީ އިންޑިޔާ ކަނޑާއި އާކްޓިކް ކަނޑެވެ. ޕެސިފިކް ކަނޑަކީ، ކަނޑުތަކުގެ ނިސްބަތުން 50.14 ޕަސެންޓެވެ. ދެބައިކުޅަ އެއްބަޔަށް ވުރެވެސް ބޮޑެވެ. އެޓްލާންޓިކް ކަނޑުގެ ޕަސެންޓަކީ 24.15 އެވެ. ގާތްގަނޑަކަށް ¼ އެވެ. އިންޑިޔާ ކަނޑަށް ލިބެނީ 21.78 ޕަސެންޓެވެ. އާކްޓިކް ކަނޑަށް 3.93 ޕަސެންޓެވެ. މީލާދީ 15 ވަނަ ޤަރުނު ނިމުމާ ހަމައަށް އައިއިރުވެސް ދުނިޔޭގެ މީހުން ބަލަނީ، އެޓްލާންޓިކް ކަނޑުގެ ހުޅަނގުގައި، ޕެސިފިކްގެ އިރުމަތީގައި ބައްރެއް ނޯންނާނެ ކަމުގައެވެ. މިކަމާމެދު، އެންމެ ފުންކޮށް ވިސްނައި، ޢިލްމީ ދިރާސާކުރި މީހަކީ، ކުރިސްޓޮފަރ ކޮލަމްބަސް އެވެ. އާދުނިޔެ ހޯދީ މީނާއެވެ.

ކޮލަމްބަސްއަކީ، އިޓަލީވިލާތުގެ ޖެނޯއާގެ ރައްޔިތެކެވެ. މީނާ އުފަންވީ 1446މ. ވަނަ އަހަރުއެވެ. ކޮލަމްބަސް ވަރަށް ކުޑައިރު، ދުނިޔެއާމެދު ވިސްނާންފެށިއެވެ. މުސްލިމް ސައިންޓިސްޓް އަލްއިދްރީސީ، ދުނިޔެއަކީ ވައް އެއްޗެއްކަމަށް ބުނެފައިވުމާއެކު، އަދި އޭނާ ގުލޯބަލެއް ހަދައި، އުތުރު ތަނޑިއާއި ދެކުނު ތަނޑި ބިނާކޮށް، އިރުގެ ވަށައިގެން ދުނިޔެ ދައުރުވާގޮތް (ދައުރާނަ) ބަޔާންކޮށްފައިވާތީ، އެކަމުގެ ތެދުކަން އިތުރަށް ހޯދުމުގެ މަސައްކަތް ކުރިއެވެ.

ބުނެވޭގޮތުގައި، ކޮލަމްބަސް ކުޑައިރު ޖެނޯއާގެ ގޮނޑުދޮށަށްގޮސް، ހިކި ކުނިބުނި މޫދަށް އުކައެވެ. އެހުރިހާ އެއްޗެއްމެ، ގޮނޑަށް ލަގުވައެވެ. މިކަމާމެދު ވިސްނުމަށްފަހު، މީނާ އަމިއްލައަށް އުޅެވޭ ވަރުވުމުން، ތަފާތު އުޅަނދު ފަހަރަށް އަރައިގެން، އައްސޭރިފަށަށް ނުކުމެއެވެ. ވަކި ހިސާބަކަށް ބޭރަށް ނުކުމެފައި އުކާ ކުނިބުނި ޖެނޯއާއަށް ނުލައްގައި ބެހޭން ފެށިއެވެ. އެހެންވުމުން އެއީ، އެހެން ރަށެއްގެ ގޮނޑަށް ލަގުވަނީ ކަން، ކޮލަމްބަސްއަށް ވިސްނުނެވެ.

އެހިސާބުގައި މިއޮންނަނީ، ހުޅަނގުން އިޓަލީގެ ބައެކެވެ. ދެން ފަރަންސޭސިވިލާތުގެ މޮނާކޯއެވެ. ދެކުނަށް އޮންނަނީ، ކޯރސިކާއެވެ. އެއީ، ކޮލަމްބަސްގެ އުފަންރަށް ކަމަށްވާ ޖެނޯއާ، އެކަނޑެއްގެ އައްސޭރީގައި އޮންނަ ލިގްރިއާން ކަނޑުގައިވާ ޖަޒީރާއެކެވެ.
                                               (ނުނިމޭ)