ރޯމަންއެމްޕެޔަރ ވެއްޓުނުދުވަސްވަރު، އިޓަލީސިފައިންގެ ކޮމާންޑަރެއްގެ މަޤާމުގައިހުރި ޝިޒާރާއަކީ، ބޯރޖިޔާ ދަރިކޮޅުގެ މީހެކެވެ. ޝިޒާރާގެ ބައްޕައަކީ، ރޯމަން ކެތަލިކް މަޒުހަބުގެ ޕޯޕެއްކަމަށްވާ، އެލެގްޒެންޑަރ (3ވަނަ) އެވެ. ޝިޒާރާ އުފަންވީ 1474 މ. ވަނައަހަރުއެވެ. ރޯމަން އެމްޕަޔަރގެ ވެރިރަށް ކަމަށްވާ، އިސްތަންބޯލް ހިފައި، އުސްމާނީ ރަސްގެފާނު މުޙައްމަދު އަލް ފާތިޙް (2) އޭނާގެ ލަޝްކަރުގެ ބާރުގައި، ރޯމަން އެންޕެޔަރ ވައްޓާލީ 1453މ. ވަނައަހަރުއެވެ. އެކަމާގުޅިގެން، ގުރީކާއި އިޓަލީގައިވާ ޢިލްމުވެރީންނާއި ފައްނުވެރިން، ހުޅަގު ޔޫރަޕަށް ހިޖްރަކުރާންފެށިއެވެ. ދުވަހަކުވެސް، އިޓަލީއަށް ނުލިބޭފަދަ ނިކަމެތިކަން މިދުވަސްވަރު ލިބެމުންދިޔައެވެ. އަދި، ވެޓިކަންސިޓީގައި، ދީނީ ހަމަތަކާއި، އިންސާފު ގެއްލި، އަނިޔާއާއި ފާޙިޝް ކަންކަން ޢާއްމުވަމުން ދިޔައެވެ.

މިދުވަސްވަރު، ޕޯޕްގެ މަޤާމުގައި ޝިޒާރާގެ ބައްޕަ އެލެގްޒަންޑަރ (3) ހުރިކަމަށްވެއެވެ. ޕޯޕްގެ މަޤާމްފުރި އެންމެ ނުބައި ފާދިރީއަކީ މީނާކަމަށް ރެކޯޑްކުރެވިފައިވެއެވެ. އެޠަބީޢަތް ނިކަން ރަނގަޅަށް ޝިޒާރާއަށް ލިބިފައިވެއެވެ. ނަމަވެސް، ޝިޒާރާއާއި އެއްބަނޑުއެއްބަފާ އަންހެނަކާއި ތިންފިރިހެނުން ތިބިއިރު، އެއީ އެފަދަ ނުބައި ބައެއްކަމަށް ނުވެއެވެ. ޝިޒާރާ ވަރަށް ޒުވާންފުރާގައި އިޓަލީގެ ސިފައިންގެ ތެރެއަށްވަނެވެ. ހަމަދާދި އަވަހަށް ކޮމާންޑަރެއްގެ މަޤާމް ލިބިއްޖެއެވެ.

ޝިޒާރާގެ ބައްޕަގެފަރާތުން މަންދޫބެއްގެގޮތުގައި، ޝިޒާރާއާއި އޭނާގެ ބޭބެ، ބޭރު ޤައުމަކަށް ފޮނުވުމުން، ރަސްމިއްޔާތު ނިމިގެން އެނބުރި އައި މަގުމަތީގައި، ޝިޒާރާގެ ކަނޑިން އޭނާގެބޭބެ ޤަތުލުކޮއްލިއެވެ. އަދި ރަށަށްއައިސް، ބޭބެއަށްވީގޮތެއް ނޭނގޭކަމަށް ބުންޏެވެ. އޭގެފަހުގައި ޝިޒާރާގެ އަންހެން ކޮއްކޮއާ ލޯބީގެގޮތުން އޭނާގުޅުނެވެ. އެދުވަސްވަރު އަންހެންކޮއްކޮ (ލޯކްރިސްޓިއާ) މީހަކާ ކައިވެނިކުރުމުން، އެކަމުގެރުޅީގައި، ޝިޒާރާގެ ކަނޑިން، ވެޓިކަންސިޓީގެ ބޮޑުމަގުމަތީގައި، ޅިޔަނު ޤަތުލުކޮއްލިއެވެ.

މިވާހަކަ ރަށުތެރޭގައި ދެކެވޭންފެށުމުން، އެވާހަކަ ދައްކާކަން ޝިޒާރާއަށް އެނގޭހުރިހާ މީހުންގެނެސް ހައްޔަރުކޮށް ތަފާތުއަނިޔާ ދެމުންގެންދިޔައެވެ. އޭގެތެރޭން އެކަކުގެ ދޫކަނޑާލައި، ބޮޑުފައްޅީގައި އެލުވިއެވެ. އޭގެފަހުން ވެޓިކަންސިޓީގައި، ޝިޒާރާގެ އަނިޔާވެރިކަން ދިޔައީ އިތުރުވަމުންނެވެ. މިމައްސަލާގައި، އިޓަލީވިލާތުގެ އެކިހިސާބުތަކުގައިވާ އަމީރުން، ކަންބޮޑުވުން ފާޅުކޮށް ވާހަކަދައްކާން ފެށުމުން، އެހުރިހާ ވެރިން ވެޓިކަންސިޓީއަށް އެއްކޮށް ޝިޒާރާގެ ކަނޑިން، އެހުރިހާވެރިން ޤަތުލުކުރިއެވެ.

މިދުވަސްވަރު، ޝިޒާރާގެ ބައްޕަ (ޕޯޕް) ނިޔާވެއްޖެއެވެ. އެދުވަހު ޝިޒާރާ، ބައްޕަގެ މޫނު ދެކެންވެސް ދިޔަކަމަކަށް ނުވެއެވެ. ދެން، ޕޯޕްގެ މަޤާމަށް އިސްކުރެވުނީ ޕަޔަސް (3) އެވެ. އޭނާއަށް އެމަޤާމް ލިބުމާއެކު، ރަސްމީބޭނުމެއްގައި، ޝިޒާރާ އިސްޕޭނަށް ފޮނުވިއެވެ. އަދި (ރޭވުމެއްގެދަށުން) އިސްޕޭން ސިފައިން ޝިޒާރާ ހައްޔަރުކޮށް ޤަތުލުކޮއްލިއެވެ. އެއަށްފަހު، އަހެއްގެމަތީގައި ބަނދެފައި، ރޯމަށް ފޮނުވިއެވެ. އެއީ 1504މ. ވަނައަހަރެވެ.