މަސްތުވާތަކެތީގެ ވަބާގައި ޖެހިފައިތިބި ކުދިންނަށް ފަރުވާދިނުމަށް ރާއްޖޭގައި ޤާއިމްކުރި ދެވަނަ ޑިޓޮކްސިފިކޭޝަން ސެންޓަރ އައްޑުއަތޮޅު ހުޅުދޫގައި މިއަދު ހުޅުވައިފިއެވެ. ހުޅުދޫގައި ހުޅުވުނު، ހުޅުމީދޫ ޑިޓޮކްސިފިކޭޝަން ސެންޓަރ ހުޅުވުމަށް އެރަށުގައި ބޭއްވި ރަސްމިއްޔާތެއްގައި އެސެންޓަރު ރަސްމީކޮށް ހުޅުއްވައިދެއްވީ ނައިބްރައީސް ޑރ. މުހައްމަދު ވަހީދު ހަސަންމަނިކުއެވެ.

މިސެންޓަރު ހުޅުއްވައިދެއްވުމަށްފަހު ނައިބްރައީސް ޑރ. މުހައްމަދު ވަހީދު ހަސަންމަނިކު ދެއްކެވި ވާހަކަފުޅުގައި ވިދާޅުވީ، މިހާރު މުޖުތަމައުގައިތިބި މަސްތުވާތަކެތީގެ ވަބާޖެހިފައިވާ ކޮންމެ ކުއްޖެއްވެސް އެބައިން ދުރުކޮށް ސަލާމަތްކުރުމަކީ އަޅުގަނޑުމެން ކޮންމެ މީހަކުވެސް ކުރަންވެއްޖެ ކަމެއްކަމަށާއި، އެއިން ކޮންމެ ކުއްޖަކަށްވެސް ފަރުވާދީގެން މުޖްތަމަޢަށް ގެނައުމަށް މިފަދަ ސެންޓަރުތަކަކީ ވަރަށް ބޭނުންތެރި މުހިންމު ސެންޓަރުތަކެއް ކަމަށެވެ. އަދި ވޭތުވެދިޔަ އަހަރެއްހާ ދުވަހުގެތެރޭގައި، މަސްތުވާތަކެއްޗާއި، އެތަކެތި އެތެރެކުރާ ފަރާތްތަށް އަތުލައިގަނެވޭ މިންވަރު އިތުރުވެފައިވާކަމަށް ނައިބް ރައީސް ވިދާޅުވިއެވެ. އަދި މިކަމުގެ ސަބަބުން ރާއްޖެއަށް އެތެރެކުރެވޭ މަސްތުވާތަކެތީގެ އަދަދު މަދުވަމުންދާކަމަށް ފާހަގަ ކުރަށްވައި، ފުލުހުން ކުރައްވާ މަސައްކަތްތަކަށް ތައުރީފް ކުރެއްވިއެވެ.

ހުޅުދޫ ރަށްވެހިގޭގެގޮތުގައި ބޭނުންކުރަމުންދިޔަ އިމާރާތުގައި ހުޅުވުނު ޑިޓޮކްސިފިކޭޝަން ސެންޓަރު ހުޅުވުމުގެ ރަސްމިއްޔާތުގައި މިނިސްޓަރ އޮފް ހެލްތް އެންޑް ފެމެލީ ޑޮކްޓަރ އައިމިނަތު ޖަމީލުވެސް ބައިވެރިވެ ވަޑައިގެންނެވިއެވެ. މިރަސްމިއްޔާތުގައި އެކަމަނާ ދެއްކެވި ވާހަކަފުޅުގައި، މަސްތުވާތަކެތީގެ މައްސަލައަކީ މިހާރުގެ ސަރުކާރުގެ އެއްވައުދު ކަމަށާއި، އެކަމުން ދިވެހި މުޖުތަމައު ސަލާމަތްކުރުމަށް ގިނަގުނަ މަސައްކަތްތަކެއް ކުރެވެމުންދާ ކަމަށް ވިދާޅުވިއެވެ.

އަދި އެހެންކަމުން އެތަކެތި ބޭނުންކުރާމީހުން އެކަމުން ދުރުހެލިކޮށް، އަލުން އެނބުރި މުޖްތަމައަށް ނުކުތުމަށް މިހުޅުވާލާ ފުރުސަތުގެ ބޭނުން ރަނގަޅުގޮތުގައި ބޭނުންކުރުމަށް އެދިވަޑައިގަތެވެ. އަދި ކުރިއަށްއޮތްތަނުގައި އައްޑުއަތޮޅުގެ އެހެން ރަށްރަށުގައިވެސް މިފަދަ ސެންޓަރުތަށް ޤާއިމްކުރުމަށް މަސައްކަތް ކުރަމުންދާކަމަށް ހެލްތް މިނިސްޓަރ ވިދާޅުވިއެވެ.

ހުޅުމީދޫ ޑިޓޮކސިފިކޭޝަން ސެންޓަރަކީ 5 މީހުންގެ ޖާގައިގެ ސެންޓަރެއްނަމަވެސް، ކުރިއަށް އޮތްތަނުގައި މިތަނުގެ ޖާގަ 10އަށް އިތުރު ކުރުމަށްވަނީ ހަމަޖެހިފައެވެ. އަދި މިތަނުގެ މަސައްކަތް ފުރަތަމަ ފަށައިގަންނައިރު ޚާއްސަ ޑޮކްޓަރަކާއި ނަރުހެއް އެތަނުގައި މަސައްކަތް ކުރާގޮތަށްވެސްވަނީ ހަމަޖެހިފައެވެ.

މަސްތުވާތަކެތީގައި ވަބާގައިޖެހޭ ޒުވާނުންނަށާއި މީހުންނަށް، އެކަމުން ސަލާމަތްވުމަށް ދެވޭ ފުރަތަމަފަރުވާ ދިނުމަށް ޤާއިމްކުރެވޭ މިޑިޓޮކްސިފިކޭޝަން ސެންޓަރުތަކުގެ އެހީގައި ގިނަބަޔަކު މަސްތުވާތަކެތީގެ ވަބާއިން ސަލާމަތްވުމަށް މަސައްކަތްކުރާނެ ަމަށް ހެލްތު މިނިސްޓްރީން އުންމީދު ކުރައްވައެވެ.

ރާއްޖޭގައި ހުޅުވުނު ފުރަތަމަ ޑިޓޮކްސިފިކޭޝަން ސެންޓަރ ހުޅުވާފައިވަނީ މާލޭގެ އަވަށެއް ކަމަށްވާ، ވިލިމާލޭގައެވެ.