ޢުމުރުން 18 އަހަރުންދަށުގެ އިންޑިޔާގެ އަންހެން ކުއްޖަކާއި، ދިވެހި ދެ ފިރިހެނަކު ކައިވެނިކޮށްގެން އުޅުނުކަމަށްބުނާ މައްސަލައެއް ފުލުހުން ތަހްޤީޤްކުރަން ފަށައިފިއެވެ. މިމައްސަލަ ފުލުހުންނަށް ފާހަގަކުރެވިފައިވަނީ މިއަހަރުގެ އޮކްޓޯބަރުމަހުގެ 31 ވަނަދުވަހު ފުލުހުންނަށް ލިބުނު މަޢުލޫމާތަކާއި ގުޅިގެންކަމަށް ފުލުހުން ހާމަކުރައްވައެވެ.

މިއަދު މެންދުރު ފުލުހުންގެ މައިމަރުކަޒުގައި ނޫސްވެރިންނަށް މަޢުލޫމާތު ދެއްވަމުން ހެޑް އޮފް ސީރިއަސް އެންޑް އޯގަނައިޒްޑް ކުރައިމް ޔުނިޓް އިންސްޕެކްޓަރ އޮފް ޕޮލިސް ހަމްދޫން ރަޝީދު ވިދާޅުވީ، ފުލުހުންނަށް މިއަންހެން ކުއްޖާގެ މަޢުލޫމާތު ލިބިފައިވަނީ އައްޑުއަތޮޅުގައި ބިދޭސީ އަންހެނަކު އަމިއްލައަށް މަރުވާން އުޅޭކަމަށް ޢާއްމު ފަރާތަކުން ކުރި ރިޕޯރޓަކުން ކަމަށެވެ.

މިމައްސަލާއިގުޅިގެން އިތުރަށް ހޯދިހޯދުންތަކުން، މިއަންހެން ކުއްޖާއަކީ މީގެ ދެއަހަރުކުރިން، 2007 ވަނައަހަރު އޭނާގެ ޢުމުރުން އެންމެ 15 އަހަރުގައި ދިވެހި ފިިރިހެނަކާ ކައިވެނިކޮށްފައިވާ ކުއްޖެއްކަން އެގުނު ކަމަށާއި، އަދި އެދިވެހި ފިރިހެން މީހާއާއި މިއަންހެން ކުއްޖާ ކައިވެނިކޮށްގެން އުޅެމުން، މިއަހަރުގެ ޖުލައިމަހު އެހެން ދިވެހި ފިރިހެނަކާވެސް ކައިވެނިކޮށްފައިވާކަން ފާހަގަކުރެވުނުކަމަށް ހަމްދޫން ރަޝީދު ވިދާޅުވިއެވެ. އަދި މިދެމީހުންނާވެސް މިއަންހެންކުއްޖާ ކައިވެނިކޮށްފައިވަނީ އިންޑިޔާގައި ކަމަށާއި، މިދިވެހި ދެފިރިހެނުންގެތެރެއިން އެކަކީ ރާއްޖޭގެ ދެކުނު އަތޮޅެއްގެ ޢުމުރުން 32 އަހރުގެ މީހެއްކަމަށާއި، އަދި އަނެއްމީހަކީ ރާއްޖޭގެ މެދުއަތޮޅެއްގެ ޢުމުރުން 40 އަހަރުގެ މީހެއްކަމަށްވެސް ހަމްދޫން ވިދާޅުވިއެވެ. ނަމަވެސް އެމީހުންގެ ނަންތައް ފުލުހުން ހާމައެއް ނުކުރައްވައެވެ.

މިމައްސަލައާއިބެހޭ އިތުރު ތަފްޞީލް ދެއްވަމުން އިންސްޕެކްޓަރ އޮފް ޕޮލިސް ހަމްދޫން ރަޝީދު ވިދާޅުވީ، މިއަންހެންކުއްޖާ ދެވަނައަށް ކައިވެނިކުރި މީހާއާއިއެކު މިއަހަރުގެ އޮކްޓޯބަރުމަހުގެ 1 ވަނަދުވަހު ރާއްޖެ އައިސްފައި ވާކަމަށާއި، މިމައްސަލައާއިގުޅިގެން މިހާތަނަށް ބެލިބެލުމުން، މިއަންހެން ކުއްޖާއަށް 18 އަހަރު ނުފުރޭތީއާއި، މިއަންހެން ކުއްޖާ ކުރިން ކައިވެންޏެއް ކޮށްފައިވާތީ، މިދެކައިވެނިވެސް ރާއްޖޭގައި ރަޖިސްޓްރީކުރުމުގައި މައްސަލަތަކެއް ދިމާވެފައިވާކަމަށް މަޢުލޫމާތު ލިބިފައިވާކަމަށާއި، މިކަންކަން ފުލުހުން މިހާރުދަނީ އިތުރަށް ސާފްކުރަމުގެ މަސައްކަތް ކުރަމުން ކަމަށްވެސް ވިދާޅުވިއެވެ. މިއަންހެންކުއްޖާ މިދެކައިވެނި ކޮށްފައިވަނީވެސް އެކުއްޖާގެ ބައްޕަގެ އެދުމުގެމަތިންކަމަށް ހަމްދޫން ވިދާޅުވިއެވެ. އަންހެންކުއްޖާ މިދެކައިވެނިވެސް ކޮށްފައިވަނީ ޢުމުރު އޮޅުވާލައި، 18 އަހަރު ފުރިފައިވާކަމަށް ހަދައިގެން ކަމަށް ފާހަގަކުރެވިފަި ވާކަމަށާއި، މިމައްސަލާގައި އަންހެން ކުއްޖާގެ ފަރާތުން ސާފްކުރަން ބޭނުންވާ މަޢުލޫމާތު ސާފްކުރުމަށްފަހު އޭނާ މިހާރުވަނީ އޭނާގެ ޤައުމަށް ފޮނުވާލެވިފައިކަމަށްވެސް ފުލުހުން މިއަދު ވިދާޅުވިއެވެ.

މިމައްސަލަ މޯލްޑިވްސް ޕޮލިސް ސަރވިސްއާއި، ދިވެހިރާއްޖޭގައި ހުންނަ އިންޑިޔަން ހައިކޮމިޝަން ގުޅިގެން ދަނީ ތަޙްޤީޤްކުރަމުންނެވެ.