އީދުވިލޭރޭ ނ. މިލަދޫގައި، އެރަށުގެ ޑީއާރުޕީ ގޮފިން ދިން ދަޢުވަތަކަށް އިޙްތިޖާޖުން ބޭއްވި އެއްވުމުގެ ރެކޯޑިންގ ރޭ 9.30 ން 11.00 އަށް ދިޓީވީން ދައްކަމުންދިޔަވަގުތު، ކޭބަލް ޓީވީ އޮޕަރޭޓަރ މީޑިޔާނެޓުން ދިޓީވީގެ ސިގްނަލް އެކިފަހަރުމަތިން ކަނޑާލާފައިވާކަމަށާއި، މިކަންކުރީ، ރައީސް ނަޝީދަށް ކުރި އަސަރެއްގެ ބޮޑުކަމުންކަމަށް ޑީއާރްޕީއާއި އުމަރު ނަސީރު އިސްވެހުންނަވައިގެން އުފައްދަވައިގެންއުޅޭ އިހްތިޖާޖުން ބުނެފިއެވެ.

މާލެއާއި މާލެކައިރި ރަށްރަށުގެ ރައްޔިތުންނަށް މިސަރުކާރާމެދު، އަތޮޅުތަކުގެ ރައްޔިތުންގެ ހިތްތަކުގައި އުފެދިފައިވާ ނަފްރަތުގެ ޝުޢޫރުތައް އެނގި އޮޅުންފިލާފާނެތީ، ސީދާ ރައީސްއޮފީހުގެ އެންގުމަށް، މީޑިޔާނެޓުން ހިންގާފައިވާ މިޢަމަލަކީ ވަރަށްވެސް ފިނޑި ޢަމަލެއްކަމަށާއި، ރޭ ދެއްކި ޖަލްސާ ރައީސް ނަޝީދު ބެލުމުން އޭނާގެ ހިތަށް ކުރި ފުން އަސަރުތަކެއްގެ ސަބަބުން، ވަގުތުން އެޓެލެކާސްޓް ކަނޑާލަން މީޑިޔާނެޓަށް އެންގީކަމަށްވެސް އިހްތިޖާޖް ޓީމުން ބުނެއެވެ.

ބާރުގެ ބޭނުން ނަހަމަގޮތުގައި ކޮށްގެން، މިނިވަން މީޑިޔާ ނިކަމެތިކޮށް، ޚުދުމުޚްތާރު ވެރިކަމެއް ހިންގަން ނަޝީދު ކުރަމުންދާ މަސައްކަތް މާލަސްތަކެއްނުވެ ފޭލްވާނެކަން ރޭވަނީ އިތުރަށް ޔަގީންވެފައިކަމަށްވެސް އެޓީމުން ބުނެއެވެ. ސަބަބަކީ، ދައުލަތުގެ ޓީވީން ނަގާ ޕޯލުތަކުންވެސް ރައީސް ނަޝީދާމެދު ރައްޔިތުން ނުރުހޭކަން މިހާރު ފެންނަމުންދާތީކަމަށްވެސް ބުނެފައިވެއެވެ.

ދިޓީވީގެ ސިގްނަލް ކަނޑާލިކަމަށްބުނެ އެކަން ކުށްވެރިކޮށް، އެފަދަ ކަންކަން ތަކުރާރުވިޔަ ނުދިނުމަށާއި، މީޑިޔާނެޓުގެ އަތުގައިއޮތް މިމޮނޮޕޮލީ ބާރާއިމެދު ފިޔަވަޅުއެޅުމަށް އެދި އިޙްތިޖާޖުން ވާނީ މިއަދު އިންފޮމޭޝަން މިނިސްޓްރީއަށް ރަސްމީ ސިޓީއެއް ފޮނުވާފައިކަމަށްވެސް، ބުނެފައިވެއެވެ. އަދި ވިޔަފާރި އުޞޫލުން ވަގުތު ގަނެގެން ދައްކަމުންދިޔަ މިޕްރޮގްރާމަށް މީޑިޔާނެޓުން ހުރަސްއެޅުމުގެ ސަބަބުން ލިބުނު ގެއްލުމުގެ ބަދަލު ހޯދުމަށް ދިޓީވީއަށްވެސް ވާނީ ރަސްމީ ސިޓީއެއް ފޮނުވާފައިކަމަށް އިހުތިޖާޖުން ބުނެއެވެ.

މިމައްސަލާގައި މީޑިއާނެޓުން ބުނަނީ، އެއީ ގަސްދުގައި ކުރިކަމެއް ނޫންކަމަށާއި، އެގޮތަށް ދިމާވީ ޓެކްނިކަލް މައްސަލައެއްގެ ސަބަބުންކަމަށެވެ.