މިދިޔަ ހުކުރުދުވަހު ރެއިންފެށިގެން ދެދުވަހުގެ މުއްދަތަށް މާލޭގައި ބޭއްވުނު ޑިމޮކްރަސީ ފެއަރ ރޭ 11:00 ގައި ނިމުނުއިރު، 21000 އަށްވުރެ ގިނަ ރައްޔިތުން މިފެއަރއަށް ޒިޔާރަތްކުރިކަމަށް ރެކޯޑްތަކުން ދައްކާކަމަށް ރައީސުލްޖުމްހޫރިއްޔާގެ އޮފީހުން ހާމަކުރައްވައިފިއެވެ.

ރައީސުލްޖުމްހޫރިއްޔާގެ އޮފީހުން މިފެއަރ އިންތިޒާމްކުރުމަށް ނެގުނު ކޮމިޓީގައި ހިމެނިވަޑައިގަންނަވާ މެމްބަރު ފުރަހަނި ޝުއައިބް އަލީ މިނޫހަށް މައުލޫމާތު ދެއްވަމުން ވިދާޅުވީ، މިއީ ރެކޯޑް އަދަދެއްކަމަށެވެ. "މާލޭގެ ދަރުބާރުގޭގެ އެތެރެއާއި ބޭރުގައި މިސަރުކާރުން ފާހަގަކުރި ޑިމޮކްރަސީ ފެއަރއަށް 21500 އަށްވުރެ ގިނަމީހުން ޒިޔާރަތްކުރިކަމަށް އަޅުގަނޑުމެންގެ ރެކޯޑްތަކުން ދައްކަނީ. މިފެއަރ ހުޅުވިރޭ، ދައުވަތު އެރުވިގެން ވަޑައިގެންނެވި ބޭފުޅުންނާއި، އާއްމުންގެތެރެއިން ވަޑައިގެންނެވި ބޭފުޅުންގެ ޖުމްލަ އުޅެނީ 7000 ގަ. އިއްޔެ ހަވީރުންފެށިގެން އިރުއޮއްސުމާއިހަމައަށް 4500 މީހުން ޒިޔާރަތްކުރި. އަދި ރޭ 10000 މީހުން ޒިޔާރަތްކުރިކަމަށް ރެކޯޑްތަކުން ފެނޭ" ޑިމޮކްރަސީ ފެއަރއަށް އާއްމުންގެ ތަރުހީބު ލިބުނު މިންވަރު ކިޔައިދެމުން ޝުއައިބް ވިދާޅުވިއެވެ.

ޝުއައިބް ވިދާޅުވިގޮތުގައި، 1993 ވަނަ އަހަރު ދިވެހިރާއްޖޭގައި ސާކް ސަމިޓް ބޭއްވުމަށް ހުޅުވުނު ދަރުބާރުގޭގެ މިދިގު މާޒީގައި އެތަކެއް ނަންނަމުގައި ފެއަރއާއި، ޖަލްސާތަކާއި ޕާޓީތައް ބޭއްވިފައިވާކަމަށެވެ. ނަމަވެސް ޑިމޮކްރަސީ ފެއަރއަށް ޒިޔާރަތްކުރި އަދަދަށް އަދި މިހާތަނަށް ދަރުބާރުގެއަށް އެއް އިވެންޓަކަށް މީހުން ޖަމާނުވާކަމަށެވެ. "ދަރުބާރުގޭގެ ދިގު މާޒީން، މިވަރުގެ ބޮޑު ތަރުހީބެއް ލިބުނު ފެއަރއެއް ނެތް. ރެކޯޑްތަކުން ދައްކަނީ މިއީ އެންމެ ކާމިޔާބު ފެއަރކަމަށް. މީގެއިތުރުން މުޅި ދައުލަތް އެއްތަނަކުން ތަމްސީލުވި ފުރަތަމަ ފެއަރއަށްވެސް މިފެއަރ ވެގެން ހިނގައްޖެ. އަދި ކުރީގެ ދައުލަތްތައް ހިނގާގޮތާއި މިހާރު ދައުލަތް ހިނގާގޮތުގެ ތަފާތު ރައްޔިތުންނަށް ފެނިގެން ހިނގައްޖެ. ދައުލަތުގެ އެންމެހާ މުއައްސަސާތަކާއިބެހޭގޮތުން ކިތަންމެ މައުލޫމާތެއް ރައްޔިތުންނަށް ސާފްވެއްޖެ" ކޮމިޓީ މެމްބަރު ޝުއައިބް ވިދާޅުވިއެވެ.

މިފެއަރގެ މަޤްސަދަކީ ސަރުކާރަށް ހާސިލްކުރެވުނު ކަންތައްތަކާއި، ނުކުރެވޭ ކަންތައްތަކުގެ މައުލޫމާތު އެރުވުންކަމަށާއި، މިގޮތުން ގައުމީ ތަރައްޤީގެ އޮނިގަނޑު އަދި އެމްޑީޕީ އިއްތިހާދުގެ ވެރިކަމަށް އެއްއަހަރު ފުރުނުއިރު ހާސިލުކުރެވިފައިވާ ކަންތައްތަކުގެ މައްޗަށް ތައްޔާރުކޮށްފައިވާ ލުއިފޮތުން މިމައުލޫމާތުތައް ލިބެން ހުންނާނެކަމަށްވެސް ޝުއައިބް ވިދާޅުވިއެވެ. މިފެއަރގެ ފުރިހަމަކަމުން، އިތުރު ދުވަސްތަކަކަށް މިފެއަރގެ މުއްދަތު އިތުރުކުރުމަށް ގިނަ އަދަދެއްގެ ރައްޔިތުންތަކެއް އެދެމުންދިޔަކަމަށްވެސް ޝުއައިބް ވިދާޅުވިއެވެ.

"ޑިމޮކްރަސީ ފެއަރ 2009" އިފްތިތާޙު ކޮށްދެއްވުމުގެ ރަސްމިއްޔާތުގައި ދަރުބާރުގޭގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވެފައިވަނީ، މިސަރުކާރުން މިއަދު ކުރައްވަމުން މިގެންދަވާ ވެރިކަން ޙަޤީޤަތުގައި ކުރައްވަމުން މިގެންދަވަނީ، ހަމައެކަނި މިއަދު މިރާއްޖޭގައި ތިބި މީހުންގެ މައްޗަށް އެކަންޏެއް ނޫންކަމަށާއި، އެވެރިކަން ކުރައްވަމުން މިގެންދަވަނީ، އަންނަންއޮތް ޖީލުތަކަށާއި، އަޅުގަނޑުމެންގެ ދަރިންނާއި ދަރިންގެ ދަރިންގެ ޑިމޮކްރަސީއަށާއި، މުސްތަޤްބަލަށްޓަކައި ކަމަށެވެ. މިފެއަރގައި 100 އަށްވުރެ ގިނަ ސްޓޯލްތައް އާއްމުންނަށް މައުލޫމާތު ދިނުމަށް ހުޅުވާފައިވެއެވެ.