ނޮވެމްބަރު ތިނެއްގެ މެޑަލް 7 ބޭފުޅަކަށް ދެއްވައިފިއެވެ. މިހަތްބޭފުޅުންނަށް ދެއްވި ނޮވެމްބަރު ތިނެއްގެ މެޑެއްޔަކީ 1988 ނޮވެމްބަރު 3 ވަނަދުވަހު ބޭރުގެ ބަޔަކު ރާއްޖެއަށްދިން ޢުދުވާނީ ހަމަލާގައި ސިފައިންގެ މީހަކަށްވެހުރެ ވަޠަން ދިފާޢުކުރުމުގެ ގޮތުން އެކަށީގެންވާގޮތެ މަސައްކަތް ކުރައްވާފައިވާކަން ފާހަގަކުރެވޭ ފަރާތްތަކަށް ދެވޭ މެޑެއްޔެކެވެ.
 
މިބޭފުޅުންނަށް މިމެޑެލް ދެއްވާފައިވަނީ، ފަހުން ބެލިބެލުންތަކުން މިބޭފުޅުންނަށް މެޑަލް ހައްޤުވާކަމަށް ފާހަގަކުރެވުމުން މިބޭފުޅުންނަށް މެޑަލް ދެއްވުމަށް ސަރުކާރުން ނިންމެވުމާ ގުޅިގެންކަމަށް މޯލްޑިވްސް ނޭޝަނަލް ޑިފެންސް ފޯރސްއިން ހާމަކުރައްވައެވެ. އަދިވެސް އިތުރަށް ބެލުމަށްފަހު، އިތުރު ބަޔަކު ފާހަގަކުރެވިއްޖެނަމަ، އެބަޔަކަށްވެސް ތިނެއް ނޮވެމްބަރުގެ މެޑަލް ދެއްވުމަށް ސަރުކާރުންވަނީ ނިންމަވާފައެވެ.

ތިނެއް ނޮވެމްބަރުގެ މެޑަލް ލިބިވަޑައިގެންނެވި ބޭފުޅުންގެތެރެއިން އިއްޔެ މެޑެލް ހަވާލުކޮށްދެއްވާފައިވާ ބޭފުޅުންނަކީ، މުޙައްމަދު އަސްލަމް ގދ.މާތޮޑާ / ގުލްފާމްގެ، އަޙުމަދު ޢަލީ ގދ.ތިނަދޫ / ޕޯޓްލޯ، މުޙައްމަދު އަމީން މއ.މާންދޫގެ، މޫސާ ރަމީޒު ވ.ފުލިދޫ / ޒަމާނީވިލާ، ޢަލީ ރިޔާޒް ހ.މެރިހާނާ އަދި ޙުސައިން ޢަބްދުﷲ ގދ.ފިޔޯރީ / ގުލްފާމްގެއެވެ.

މީގެއިތުރުން އިއްޔެ ބޭއްވި ޚާއްޞަ ރަސްމިއްޔާތެއްގައި މަސްއޫދު ޢަލީ ސ.ހުޅުދޫ / ހެޕީކޯނަރ އަށްވެސް ތިނެއް ނޮވެމްބަރުގެ މެޑަލް ވަނީ ދެއްވާފައެވެ. ޑިފެންސް މިނިސްޓްރީގައި ވަކިން ބޭއްވި ރަސްމިއްޔާތުގައި މަސްއޫދުއާއި މެޑެލް ހަވާލުކޮށްދެއްވީ މިނިސްޓަރ އޮފް ޑިފެންސް އެންޑް ނޭޝަނަލް ސެކިޔުރިޓީ އަމީން ފައިޞަލްއެވެ.

ކުލަގަދަކޮށް ސިފައިންގެ މައިމަރުކަޒު ބަންޑާރަކޮށީގައި އިއްޔެ ހެނދުނު ބޭއްވި ޚާއްޞަ ރަސްމިއްޔާތެއްގައި ނޮވެމްބަރު ތިނެއްގެ މެޑަލް ޙައްޤުވާ ފަރާތްތަކަށް މެޑަލް ޙަވާލުކޮށްދެއްވީ މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ ް އަމީން ފައިޞަލްއެވެ. މިރަސްމިއްޔާތުގައި ޗީފް އޮފް ޑިފެންސް ފޯސް މޭޖަރ ޖެނެރަލް މޫސާ ޢަލީ ޖަލީލާއި، ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް ފަރުހަތު ސަހީރުގެ އިތުރުން، އެމް.އެން.ޑީ.އެފްގެ ޖެނެރަލް އޮފިސަރުންނާއި އޮފިސަރުން އަދި މެޑަލް ލިބިވަޑައިގެންނެވި ބޭފުޅުންގެ ޢާއިލާތަކުން ބައިވެރިވެވަޑައިގެންނެވިއެވެ.