ރާއްޖޭގައި ބޭއްވުނު ގިނަ ޕާޓީ ވާދަކުރި ފުރަތަމަ ރިޔާސީ އިންތިޚާބު، އެމްޑީޕީ އިއްތިހާދުގެ ކެންޑިޑޭޓް މުހައްމަދު ނަޝީދު ކާމިޔާބު ކުރައްވައި، ޑިމޮކްރަސީގެ އުޞޫލުން އިންތިޚާބު ކުރެވުނު ފުރަތަމަ ރައީސުލްޖުމްހޫރިއްޔާ ކަމަށް އެމަނިކުފާނު ވެވަޑައިގެން ސަރުކާރު ހިންގަވަން ފެއްޓެވިތާ އެއްއަހަރު ފުރުމުގެ މުނާޞަބަތުގައި އެމްޑީޕީން އިންތިޒާމްކޮށްގެން މާލޭގައި ޚާއްޞަ ހިނގާލުމެއް ބާއްވައިފިއެވެ.

ބޯކޮށް ވެހެމުންދިޔަ ވާރޭގެ ތެރޭގައި، އިއްޔެ ހަވީރު 4.00 ގައި ސޯޝަލް ސެންޓަރު ކައިރިން ފެށިގެން މަޖީދީ މަގު ހުރި ގޮތަށްގޮސް އާރޓިފިޝަލް ބީޗް ސަރަހައްދަށް ނިންމާލި މިހިނގާލުމުގައި އެމްޑީޕީގެ ވަގުތީ ރައީސް އިބްރާހީމް ހުސައިން ޒަކީއާއި، ޗެއަރ ޕާސަން އަލްއުސްތާޛާ މާރިޔާ އަޙުމަދު ދީދީއާއި، ސަރުކާރުގެ ބައެއް ވަޒީރުންނާއި، ޕާލަމެންޓްރީ ގްރޫޕްގެ ލީޑަރު އަދި ހުޅުހެންވޭރު ދާއިރާގެ މެންބަރު މޫސާ މަނިކުގެ އިތުރުން ބައެއް ވަޒީރުންނާއި، އެމްޑީޕީގެ ޕާލަމެންޓްރީ ގްރޫޕްގެ ބައެއް މެންބަރުންނާއި ވަރަށްގިނަ އަދަދެއްގެ އެމްޑީޕީގެ ސަޕޯޓަރުންނާއި ސަރުކާރަށް ތާޢީދުކުރާ ވަރަށްގިނަ ޢަދަދެއްގެ މީހުން ބައިވެރިވިއެވެ.

މަގުމަތީގައި މުޒާހިރާ ކުރިއަށްދިޔައިރު، އެމްޑީޕީގެ ޕާލިމެންޓްރީ ގްރޫޕްގެ ރައީސް މޫސާ މަނިކް ވިދާޅުވީ، ސަރުކާރަށް އެއްއަހަރު ފުރޭއިރު އިދިކޮޅު ޑީއާރްޕީން ޒިންމާދާރުގޮތެއްގައި ހަރަކާތްތެރިވެވަޑައިގަންނަވާތަން ނުފެންނަކަމަށެވެ. އޭގެބަދަލުގައި ޑީއާރްޕީގެ މެމްބަރުންގެ ކިބައިން ފެންނަނީ ސަރުކާރަށް ޖެއްސުންކޮށް، ވަޒީރުންގެ މަޖިލީހުގެ މެމްބަރުންގެ އިތުބާރު ނެތްކަމުގެ ވޯޓާއި، ޕެޓިޝަންތަކާއި ކުއްލި މައްސަލަ މަޖިލީހަށް ވައްދާ މަންޒަރުކަމަށެވެ. އެހެންކަމުން ޑީއާރްޕީ ޒިންމާދާރު އިދިކޮޅު ސިޔާސީ ޕާޓީއަކަށްވުމަށް މޫސަ ގޮވާލެއްވިއެވެ.

އެމްޑީޕީން މިބޭއްވި ކާމިޔާބު ސުލްހަވެރި ހިނގާލުން އާރޓިފިޝަލް ބީޗަށް ނިންމާލުމަށްފަހު އިއްތިހާދުގެ ބޭފުޅުން ހިނގާލުމުގެ ބައިވެރިންނާ މުޚާޠަބު ކުރެއްވިއިރު މިހިނގާލުމުގެ ބައިވެރިން އެތުރިގެންތިބީ އާރޓިފިޝަލް ބީޗްގައި އެމްޑީޕީން އެންމެ ފުރަތަމަ ބޭއްވި މުޒާހަރާގެ ހަނދާން އާކުރުމުގެގޮތުން އެމުޒާހަރާގައި އެތުރިގެން ތިބި ބުރުގެ ވަށައިގެންނެވެ.

މިހިނގާލުމުގެ ބައިވެރިންނާ މުޚާޠަބު ކުރެއްވި ބޭފުޅުންގެތެރޭގައި އެމްޑީޕީގެ ވަގުތީ ރައީސް އިބްރާހީމް ޙުސައިން ޒަކީއާއި، ޗެއަރޕާސަން އަލްއުސްތާޛާ މާރިޔާ އަހުމަދު ދީދީއާއި، އެމްޑީޕީގެ ޕާލަމެންޓްރީ ގްރޫޕްގެ ލީޑަރު މޫސާ މަނިކުގެ އިތުރުން އަދާލަތު ޕާޓީގެ ރައީސް އައްޝައިޚް ހުސައިން ރަޝީދު އަހުމަދާއި، ގައުމީ އިއްތިހާދުގެ ފަރާތުން އެޑިއުކޭޝަން މިނިސްޓަރ ޑރ.މުސްތަފާ ލުތުފީއާއި، މޯލްޑިވްސް ނެޝަނަލް ކޮންގްރެސްގެ ލީޑަރު މުހައްމަދު ނަޢީމްއާއި، އެމްޑީޕީއާއި ޖުމްހޫރީ ޕާޓީގައި އިސް ދައުރެއް އަދާކުރެއްވި މުހައްމަދު އިބްރާހީމް ދީދީ ވާހަކަފުޅު ދެއްކެވިއެވެ.

ރާއްޖޭގައި 30 އަހަރު ވަންދެން ހިންގަމުން ދިޔަ ސަރުކާރު، ޑިމޮކްރަސީގެ ރިވެތި އުޞޫލާ އެއްގޮތަށް ޤާނޫނީ ހަމަތަކުގެމަތިން ވައްޓާލައި، ރައްޔިތުންގެ ސަރުކާރެއް ޤާއިމްވިތާ އެއްއަހަރުފުރުން ފާހަގަކުރުމަށް މިބޭއްވި ޚާއްސަ ހިނގާލުމުގައި ބޯވާރޭގެތެރޭގައި އެމްޑީޕީގެ އެތައްސަތޭކަ ސަޕޯޓަރުންނާއި، ސަރުކާރަށް ތާޢީދު ކުރައްވާ ގިނަ އަދަދެއްގެ ބަޔަކު ބައިވެރިވިކަން ރަމްޒުކޮށްދެނީ އަދުގެ އޯގާތެރި ސަރުކާރަކީ ރައްޔިތުން ބަލައިގަންނަ، ދިވެހި ރައްޔިތުންގެ ތެރެއިން ގިނަ ބައެއްގެ އިތުބާރާއި ލޯބި ލިބިފައިވާ ސަރުކާރެއްކަން، ކަމަށް އެމްޑީޕީން ބުނެއެވެ.

ރައީސުލްޖުމްހޫރިއްޔާ ބައިވެރިވެވަޑައިގަންނަވާގޮތަށް ކުރިން ހަމަޖެހިފައިއޮތް މިހިނގާލުމުގައި، ރައީސް ނަޝީދު ބައިވެރިވެވަޑައިނުގެންނެވީ އާލާސްކަންފުޅާ އުޅުއްވާތީކަމަށް އެމްޑީޕީން ބުނެފައިވެއެވެ.