އޮޑިޓަރ ޖެނެރަލް މުހައްމަދު ނަޢީމަށް ކަޓަރުން ހަމަލާދިން މީހަކަށް 50,000 (ފަންސާސް ހާސް ދިވެހި ރުފިޔާ) ދޭނެކަމަށް ބުނެ، ރޭގެ ވަގުތެއްގައި ބަޔަކުމީހުން މާލެތެރެއަށް ލިޔުންތަކެއް އަޅައިފިއެވެ. މިއީ ކޮންބަޔަކު، ކޮން ވަގުތެއްގައި ކުރިކަމެއްކަމެއް ރަސްމީ އެއްވެސް ފަރާތަކުން ކަށަވަރުކޮށްދީފައެއް ނުވެއެވެ.

މޯލްޑިވްސް ޕޮލިސް ސަރވިސްގެ އޮފިޝަލެއް މިއަދު ވިދާޅުވީ، އެފަދަ މައުލޫމާތެއް އެސަރވިސްއަށް ލިބިފައިވާކަމަށާއި، އެކަމާއިގުޅިގެން ފުލުހުން ބަލަންޖެހޭ ކަންތައްތައް މިހާރު ގެންދަނީ ބަލަމުންކަމަށެވެ.

ރޭގެ ވަގުތެއްގައި މަގުތަކަށް އަޅާފައިވާ ލިޔުންތަކެއްގައި މީހަކަށް ކަޓަރުން ޙަމަލާދިނުމަށާއި، އެކަން ކުރިމީހަކަށް ބައިމިލިއަން ރުފިޔާ ދޭނޭ ކަމަށާއި، އެލިއުމުގައި އެމީހާގެ ފޯނު ނަންބަރާއި، މާލޭ މުނިސިޕަލްޓީގެ ރައީސް ސަރަނގު އާދަމް މަނިކްގެ ފޯން ނަންބަރުވެސް ލިޔެފައިވާކަމަށް، މިއަދު މެންދުރުފަހު ދިވެހިރާއްޖޭގެ އަޑުގެ ސެނެކޯ މާލަމުގައި އޮތް ނޫސްވެރިންގެ ބައްދަލުވުމެއްގައި މުނިސިޕަލްޓީގެ ރައީސް ވިދާޅުވިއެވެ. ނަމަވެސް ޙަމަލާދިނުމަށް ބުނެފައިވަނީ ކާކަށް ކަމެއް މުނިސިޕަލްޓީގެ ރައީސް ހާމައެއް ނުކުރައްވައެވެ. ނަމަވެސް އެއީ އޮޑިޓަރ ޖެނެރަލްކަމަށް ބެލެވެއެވެ.

އާދަމް މަނިކް ވިދާޅުވީ، އެމްޑީޕީން ވެރިކަމަށް އައިސްފައިވަނީވެސް އިދިކޮޅު ޕާޓީއެއްގެގޮތުގައި، ޒިންމާދާރުކަމާއެކު އަހަރުތަކެއްވަންދެން މަސައްކަތް ކުރުމަށްފަހުގައި ކަމަށާއި، އޭރުވެސް މިހާރުވެސް އެމްޑީޕީން ވަކި ސުލޫކީ މިންގަނޑެއް ހިފަހައްޓާކަމަށެވެ. އެކަމަކީ ވަރަށް ކަންބޮޑުވާ ކަމެއްކަމަށާއި އެފަދަ އަމަލުތައް ނުހިންގުމަށް އާދަމް މަނިކް ވިދާޅުވިއެވެ. އޭނާ މިއިޝާރާތްކުރައްވަނީ މިހާރު އިދިކޮޅު ޕާޓީގެގޮތުގައި ޙަރަކާތްތެރިވާ ޕާޓީތަކަށް ކަމަށް ބެލެވެއެވެ. "ޑްރަގް ނަގާ މީހުންވެސް އެބައުޅޭ މިމުޖްތަމައުގަ. އެފަދަ މީހަކަށް އެކަހަލަ ލިޔުމެއް ފެނިގެން އެފަދަ އަމަލެއް ހިންގައިފިނަމަ އެކަން ވެގެންދާނީ ވަރަށް ކަންބޮޑުވެ ހިތާމަކުރަންޖެހޭނެ ކަމަކަށް. އެހެންވީމާ އެފަދަ ކަންތަކަށް ހިތްވަރުނުދޭން އަޅުގަނޑުމެން މިދަންނަވަނީ" އާދަމް މަނިކް ވިދާޅުވިއެވެ.  

އޮޑިޓަރ ޖެނެރަލްއަށް މަރުގެ އިންޒާރުތަކުގެ ލިޔުންތަކެއް އައިސްފައިމިވަނީ، ކުރީގެ ރައީސް މައުމޫން ވެރިކަންކުރެއްވިއިރު ދިރިއުޅުއްވި ރިޔާސީ ގަނޑުވަރު، ތީމުގެ އޮޑިޓްކުރުމަށްފަހު އެރިޕޯޓް އާއްމުކުރިތާ ހަފްތާއެއްވެސް ނުވަނީހެވެ. މިކަމާއިގުޅިގެން އޮޑަޓަރ ޖެނެރަލްއާއި ގުޅުމަށް ކުރި މަސައްކަތް ނޫސް ޗާޕަށް ދިޔައިރުވެސް ކާމިޔާބުވާގޮތެއް ނުވިއެވެ.